Prezıdent tapsyrmasy: Almatyda monıtorıng toptary jumysyn kúsheıtti
ALMATY. QazAqparat - Almaty qalasy ákiminiń orynbasary Erjan Babaqumarov qalada kásipkerlik nysandarynyń jáne jeke tulǵalardyń sanıtarlyq-epıdemııalyq qaýipsizdik talaptaryn saqtaýyn baqylaıtyn monıtorıngtik toptardyń jumysyn kúsheıtý máseleleri boıynsha keńes ótkizdi, dep habarlaıdy QazAqparat tilshisi.
Jıyn Memleket basshysy Qasym-Jomart Toqaevtyń pandemııanyń ekinshi tolqynyna daıyndyq jónindegi keńeste bergen tapsyrmalaryn oryndaý úshin uıymdastyryldy.
Jıynǵa qalalyq taýarlar men qyzmetterdiń sapasy men qaýipsizdigin baqylaý departamenti, Polıtsııa departamenti, prokýratýra, Kásipkerlik jáne ınvestıtsııalar basqarmasy, sondaı-aq Nur Otan partııasynyń Almaty fılıaly, «Jas Otan», almatylyq «Atameken» kásipkerler palatasynyń basshylary jáne birqatar volonterlik uıymdar men úkimettik emes uıym ókilderi qatysty.
Keńeste kásipkerlik obektileri men jeke tulǵalardyń sanıtarlyq-epıdemıologııalyq qaýipsizdik talaptaryn saqtaýdy baqylaý jónindegi monıtorıngtik toptardyń jumysyn kúsheıtýdiń uıymdastyrýshylyq máseleleri qaraldy.
Epıdemııalyq jaǵdaıdy taldaý sońǵy kúnderi Almatyda koronovırýs ınfektsııasyn juqtyrý jaǵdaılarynyń sanynyń artýyna yqpal etetin birqatar jaǵymsyz faktorlardyń bar ekenin kórsetedi. Olardyń basty sebepteriniń biri koronavırýs indetiniń elimizge vırýs juqtyrý jaǵdaılary artyp otyrǵan shet memleketterden jetkizilýi bolyp otyr.
Osyǵan baılanysty Almaty halyqaralyq áýejaıynda sanıtarlyq-epıdemııalyq baqylaýdy kúsheıtý boıynsha sharalar qabyldandy. Atap aıtqanda, monıtorıngtik toptarǵa kelesi mindetter tapsyryldy:
1) kásiporyndar, mekemeler, sonymen birge, halyqqa qyzmet kórsetetin uıymdar úshin belgilengen sanıtarlyq-epıdemııalyq talaptardyń oryndalýyna tekserýdi uıymdastyrý;
2) kásiporyndar, saýda úıleri, bazarlar, áýejaı, vokzaldar, qoǵamdyq kólikter jáne qaladaǵy basqa da uıymdardyń, sondaı-aq, halyq kóp ornalasqan aýdandarda sanıtarlyq-epıdemııalyq normalardyń oryndalýyna turaqty monıtorıng júrgizý;
3) adamdar kóp jınalýy múmkin jerlerde shekteý sharalaryn nyǵaıtý jáne profılaktıkalyq jumystardy júgizýdi jalǵastyrý, aýrý juqtyrý kózderin, vırýstyń berilý tizbegin anyqtaý jáne shekteý, baqylaý sharalaryn qabyldaıtyn ýákiletti qurylymdarǵa aqparat berý.
Almatyda osy maqsatta 26 monıtorıngtik top jumys isteıdi. Olardyń quramynda Polıtsııa departamentiniń, Taýarlar men qyzmetterdiń sapasy men qaýipsizdigin baqylaý departamenti aýdandyq basqarmalarynyń, «Atameken» kásipkerler palatasynyń ókilderi bar. Sondaı-aq úkimettik emes sektordyń ókilderi men eriktiler erekshe úles qosýda, olar monıtorıng toptaryna tártip buzýshylyq faktilerin anyqtaýǵa járdemdesedi.
Buǵan qosa osy baǵyttaǵy jumystardyń ashyqtyǵyn jáne shynaıylyǵyn qamtamasyz etý úshin qoǵamdyq densaýlyq saqtaý basqarmalaryna, aqparattyq qyzmetterge koronavırýske qarsy aýqymdy túsindirý naýqanyn jalǵastyrý jáne COVID-19-dyń aldyn alýdaǵy negizgi ádis retinde halyqqa gıgıenalyq tárbıe júrgizý tapsyryldy.
Monıtorıngtik toptardyń jumysynyń maqsaty - koronavırýs ınfektsııasynyń taraýyna jol bermeý jáne qala turǵyndarynyń vırýs juqtyrýynyń aldyn alý.
Bıyl 5 shilde men 7 qazan aralyǵynda monıtorıngtik toptar 9 myńǵa jýyq nysandy tekserdi. Tekserý is-sharalarynyń qorytyndysy boıynsha Ákimshilik quqyq buzýshylyq týraly QR ÁQBtK-niń 425-babyna sáıkes (zańdy jáne jeke tulǵalarǵa) jalpy somasy 287 mln teńgege 3836 hattama toltyryldy.
Almaty ákimdigi kásipkerlik sýbektilerine pandemııanyń jańa tolqynynyń qaýpi tóngen kezde qaýipsizdik sharalarynyń talaptaryn múltiksiz saqtaý qajettigin eske salady. Al sanıtarlyq talaptardyń buzylýy - uıym qyzmetkerleri arasynda aýrý taraýyna jáne obektini paıdalanýdy toqtatýǵa negiz bolady.
Almaty ákimdigi megapolıs turǵyndary men qonaqtaryn maska rejımin jáne áleýmettik qashyqtyqty qatań ustanýǵa, jeke gıgıena sharalaryn saqtaýǵa shaqyrady. Densaýlyqty qorǵaýdyń bul sharalary ásirese turǵyndardyń álsiz toptaryna – balalarǵa, egde jastaǵy, sonymen qatar, sozylmaly aýrýlary bar adamdarǵa qatysty.
Qalanyń bas memlekettik sanıtarııa dárigeri Jandarbek Bekshın qoǵamdyq kólikte sanıtarlyq saqtyq sharalaryn saqtaýdyń mańyzdylyǵyn atap ótti. Ata-analarǵa balalar alańynda júrgen balalaryna baqylaýdy kúsheıtý usynylady. Vırýstyq aýrýlardyń maýsymdyq ósýi kezinde barlyq qala turǵyndary ózderin jáne ózderin qorshaǵan adamdardy qorǵaýy kerek - maska rejımine beı-jaı qaramaýlary kerek.
Karantın talaptaryn buzǵany úshin jeke tulǵalarǵa 30 AEK; shaǵyn kásipkerlik sýbektileri úshin – 230 AEK (638 940 teńge), orta kásipkerlik sýbektileri úshin – 310 AEK (861 180 teńge), iri kásipkerlik sýbektileri úshin – 1600 AEK (4 444 800 teńge) mólsherinde aıyppul qarastyrylǵan.
