Prezıdent tapsyrmasy: Almatyda qurylys júrgizýdiń jańa erejeleri qabyldandy
ALMATY. QazAqparat- Baqytjan Saǵyntaev Almatyda qurylys júrgizýdiń jańa erejeleri turǵyndarynyń múddelerin eskere otyryp, qala qurylysyn retteý maqsatynda qabyldanǵanyn aıtty, dep habarlaıdy QazAqparat.
Almaty ákiminiń aıtýynsha, megapolıste qurylys júrgizýdiń erejeleri 15 jyldan keıin alǵash ret qabyldanyp otyr. Memleket basshysy Qasym-Jomart Toqaevtyń tapsyrmasyna sáıkes tarıhı ortalyqtyń erekshe arhıtektýralyq kelbetin saqtaý jáne áleýmettik ınfraqurylymdy, kógaldandyrýdy damytýǵa basa nazar aýdarý, qala qurylysyn retteý maqsatynda ázirlendi.
Qujatty daıyndaý kezinde qala qurylysyn retteýdiń halyqaralyq tájirıbesine, Qazaqstan Respýblıkasynyń qoldanystaǵy normatıvterine, qala qurylysyn josparlaýdyń arhıvtik materıaldaryna taldaý júrgizildi.
Sondaı-aq, qoǵam belsendileri men qala turǵyndarynyń naqty qurylystarǵa, aýlalardy salýǵa, qabatttar sany men turǵyndardyń tyǵyzdyǵyna qatysty pikirleri eskerildi.
17 aqpanda qujat jobasy Almatynyń bas josparyn túzetý jobasy boıynsha jumys toptarynyń qatysýshylaryna talqylaýǵa usynyldy. 25 naýryzda joba NQA portalynda kópshilikke jarııa etildi. Munda qala turǵyndarynyń pikirleri men usynystary da jarııalandy. Olardyń bári nazarǵa alynyp, qujatqa engizildi.
«Endi biz qala qurylysy protsesin qalamyzdyń tarıhı jáne áleýmettik erekshelikterin ári almatylyqtardyń pikirin eskere otyryp, retteı alamyz», - dep atap ótti Baqytjan Saǵyntaev tikeleı efır barysynda.
Erejelerge tarıhı ortalyqtyń saqtalýy, núkteli qurylysqa tyıym salý negiz bolǵan. Qala turǵyndarynyń jaıly, estetıkalyq turǵydan qolaıly, qaýipsiz orta, qoljetimdi ınfraqurylym jónindegi usynystary eskerildi.
«Bul erejeler – Almatyny jaqsartý úderisindegi úlken qadam ári qala qurylysyn josparlaýdaǵy, jaılylyq pen tartymdylyq jolyndaǵy aýqymdy shara. Erejede Almatynyń biregeı sáýlettik kelbetin jáne árbir qala turǵyny úshin kógaldandyrý aýmaǵyn saqtaý erekshe oryn alady. Qala qurylysyn josparlaýda jobalar qoǵamdyq talqylaýdan ótetin bolady»,- dedi Baqytjan Saǵyntaev.
Tarıhı jáne mádenı eskertkishter qorǵalatyn aımaqtar shekarasynda tarıhı ǵımarattardyń qurylymy men stılin, proportsııalary men bıiktigin buzýǵa jol berilmeıdi. Sondaı-aq, ruqsat etilgen shekti bıiktikten jáne aımaqtaǵy ǵımarattardyń ortasha bıiktiginen asýǵa ruqsat etilmeıdi. Tarıhı aımaqtaǵy jáne 50 metrge deıingi radıýstaǵy tarıhı-mádenı eskertkishter qorǵalatyn aımaqtarynda sáýlettik sheshimniń buzylýyna tyıym salynady.
«Halyqtyń tyǵyzdyǵyna keletin bolsaq, kvartaldy qurylystyń 1 gektarynda turǵyndardyń tyǵyzdyǵy 440 adamnan, al tarıhı ortalyqta gektaryna 300 adamnan aspaýy tıis»,-dedi Almaty ákimi.
