Prezıdent tapsyrmasy: Aqtóbede jylyna 500-600 gektar jer ormandy alqapqa aınalmaq
Aqtóbe oblysy boıynsha barlyǵy 7 orman sharýashylyǵy bar. Qazirgi kezde ormanshylar tálimbaqta baptalǵan ekpeni ege bastady.
«Tuqym egilip, tálimbaqta baptalady. Standarttyq úlgige jetken kezde orman alqabyna otyrǵyzylady. Keıbir ekpe bir jylda, keıbiri 2-3 jylda ósip-ónedi. Tamyry tereń, sabaǵynyń dıametri 3 mm, bıiktigi 15-40 sm bolýy tıis. Aldaǵy bes jylda 10 túrin egemiz. Olar: qaraǵaı, terek, qaıyń, shaǵan, shegirshin, qaraqat, jıde, qara sekseýil, orman almasy, úıeńki», - dedi oblystyq tabıǵı resýrstar jáne tabıǵatty paıdalanýdy retteý basqarmasy orman sharýashylyǵy bóliminiń basshysy Ǵabıt Qylyshbaev. Osy jolmen jyl saıyn 500-600 gektar jerdi ormanmen kómkerilgen alqapqa aınaldyrý kózdelgen. Jospar boıynsha bıyl barlyǵy 1 myńnan gektardan astam alqapqa 2 mln túp jasyl óskin otyrǵyzylady. Al bes jyldyq meje - 60 mln túp ekpe.
«Jospardyń teń jartysy oryndaldy. Aýa raıyn baılanysty keıbir aýdan jumysty bastaı almaı otyr. Bes jyl boıy kútim jasap, keıin orman alqabynyń esebine alamyz. Negizi ekken óskin sýarylmaıdy. Tabıǵı jolmen ósýi tıis. Osylaı biz 2022-2023 jyldary jyl saıyn 7 myń ga alqapqa ekpe egemiz», - dedi Ǵabıt Qylyshbaev.
Eske sala ketsek, Memleket basshysy Qasym-Jomart Toqaev Qazaqstan halqyna arnaǵan bıylǵy Joldaýynda 2025 jylǵa deıin el kóleminde 2 mlrd túp aǵash otyrǵyzý mindetin qoıǵan bolatyn. Sonymen qatar, elimizde jyl saıyn 372 mln túp tal egiletindigi aıtyldy.