Prezıdent tapsyrmasy: Aqtóbede ózen arnasyn keńeıtý jumysy ýaqytsha toqtatyldy
Top músheleri Aqtóbe sý qoımasy men Qarǵaly, Elek ózenderiniń búgingi jaǵdaıymen tanysty. Jergilikti belsendiler jobalaýshylarmen, mamandarmen betpe-bet kezdesip, zeınettegi ekologtar óz pikirin bildirdi.
«Prezıdenttiń tikeleı tapsyrmasymen bir top maman Aqtóbege keldi. Arnaıy topty ózim basqaramyn. Búgin birneshe nysandy aralap, halyqpen kezdestik, jumystarmen tanystyq. 2017 jyly sý tasqyny bolyp, júzdegen úı sý astynda qaldy. Endi osyndaı jaǵdaı qaıtalanbas úshin tıisti jumystardy atqarý kerek. Degenmen halyqty «bul jumystar qalaı atqarylýda» degen másele, tehnologııasy alańdatyp otyr. Kesilgen aǵashtar da narazylyq týdyrǵan. Jasyratyny joq, Aqtóbe shóleıtti óńir. Aǵashtar qaıda egiledi dep te surady. Qurylǵan topqa jergilikti adamdar da kiredi. Qoǵammen aqyldasyp, naqty sheshimge kelý kerek. Búgin naqty sheshimge kelý qıyn», - dedi mınıstr Maǵzum Myrzaǵalıev.
Qazirgi kezde qylmystyq is týraly másele qozǵalyp jatqan joq.
«Memleket basshysy Aqtóbeniń ekologııalyq problemalaryn jaqsy biledi. Bir ǵana sý tasqyny, onyń saldarymen kúres jumystary ǵana emes. Oǵan qosa Alǵa hımııalyq zaýytynyń problemasy, káriz sýyn tazalaý qurylǵysy bar. Jergilikti halyq túnde jaman ıis shyǵatynyn aıtady. Kókjıde sý ken ornynyń máseleleri de bar. Bári mınıstrliktiń quzyryna kiredi. Búgin aıtylǵan pikirler estildi, tyńdaldy. Jumysty toqtatý máselesi qıyn suraq. Degenmen jumys toby naqty sheshim alý úshin eki apta, bálkim bir aıǵa jýyq ýaqyt kerek. Sol aralyqta ýaqytsha osy jumysty toqtatý kerek. Aqtóbede ekologııalyq másele kóp», - dedi mınıstr.
Eske salsaq, Memleket basshysy Qasym - Jomart Toqaev mınıstr Maǵzum Myrzaǵalıevke Aqtóbedegi ekologııalyq jaǵdaıdy shuǵyl túrde sheshýdi tapsyrǵan edi.
