Prezıdent tapsyrmasy: Aqtaýda Qazaq-nemis ınjınırıng ınstıtýty ashylady
Instıtýtqa bıylǵy jańa oqý jylynan bastap logıstıka jáne energetıka mamandyqtary boıynsha stýdentter qabyldanady, dep habarlaıdy QazAqparat tilshisi.
Bul bastama Prezıdent Qasym-Jomart Toqaevtyń elektr energetıka salasyn jáne balamaly energetıkany damytý máseleleri jónindegi tapsyrmasyn oryndaý maqsatynda Ǵylym jáne joǵary bilim mınıstri Saıasat Nurbektiń QR joǵary oqý oryndary arasyna berilgen tapsyrmasy aıasynda júzege asyrylyp otyr.
Óńirde «Qazaq-nemis ınjınırıng ınstıtýty» qurylmaq. Bul Yessenov ýnıversıteti bazasynda júzege asady.
«2022 jyly bilim, ǵylym salasyndaǵy bilikti mamandardy daıarlaý boıynsha qazan aıynda bastalǵan protsess nátıjesinde nemistiń 7 ýnıversıtetimen konsortsıým quryldy. Negizgi maqsat Mańǵystaý óńirine qajet mamandardy Aqtaý ýnıversıtetiniń qabyrǵasynda oqytý. ıAǵnı, stýdentter shetelge shyqpaı-aq, halyqaralyq ýnıversıtetterdiń aqtaýlyq fılıalynda bilim alatyn bolady. Bul óz kezeginde álemdik básekege qabiletti mamandar legin qalyptastyrady», - deıdi Yessenov University prezıdenti Berik Ahmetov.
Instıtýtta bilim berý aǵylshyn, nemis tilderinde júzege asyrylady. Al stýdentter bakalavrıat boıynsha 8 mamandyqty, magıstratýra boıynsha 6 mamandyqty oqı alady. Ýnıversıtetti bitirgen túlekter qos dıplomǵa jáne úsh dıplomǵa ıe bolady.
Aqtaýǵa sheteldik ýnıversıtetter fılıaldaryn ákelý óńir ekonomıkasy úshin de tıimdi bolmaq.
Foto: Yessenov ýnıversıtetiniń baspasóz qyzmeti
