Prezıdent tapsyrmasy: 282 kolledjdi iri bıznes óz qamqorlyǵyna alady
Bul týraly QR BǴM Tehnıkalyq jáne kásiptik bilim berý departamentiniń dırektory Nasymjan Ospanova málim etti, dep habarlaıdy QazAqparat tilshisi.
«Prezıdent tapsyrmasyna sáıkes óńirlerde kolledjderdi iri bıznestiń qamqorlyǵyna berý praktıkasy engizildi. Oblys ákimdikteri «Atameken» kásipkerler palatasymen birlesip, kolledjderdi óz qamqorlyǵyna alatyn iri kásiporyndardyń tizbesin aıqyndady. Qazirgi ýaqytta 282 kolledjdi 343 kompanııa óz qamqorlyǵyna alý boıynsha kelisimderge qol qoıdy», - dedi Nasymjan Ospanova Ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, kásiporyndar kolledjderdiń qamqorshylyq keńesiniń quramyna enedi.
«Sonymen qatar atalǵan kásiporyndar qamqorlyǵyna alǵan kolledjdiń materıaldyq-tehnıkalyq bazasyn nyǵaıtýǵa, stýdentterdiń praktıka men taǵylymdamadan ótýine qoldaý kórsetedi. Jalpy bizdiń mınıstrliktiń jumysy Memleket basshysynyń tapsyrmalaryn oryndaýǵa jáne kadrlar daıarlaýdyń sapasyn arttyrýǵa baǵyttalady», - deıdi ol.
Eske sala ketsek, bıyl qańtarda Memleket basshysy elimizdiń iri bıznes ókilderimen kezdesýi barysynda bıznesti otandyq joǵary oqý oryndaryn qamqorlyqqa alýǵa shaqyrǵan edi.
«Máselen, bilikti kadrlardyń, ásirese tehnıkalyq mamandyqtar boıynsha joqtyǵyna shaǵymdanǵannyń ornyna iri bıznes kolledjderdi qamqorlyqqa alyp,, olardyń qamqorshylyq keńesine kirip, jastardy tájirıbege nege almasqa, zerthanalar men sheberhanalardy jabdyqtamasqa? Bul baǵytta jumys istep jatqan jekelegen korporatsııalardyń bar ekendigin bilemin. Degenmen, muny jappaı jolǵa qoıý kerek», - degen edi Qasym-Jomart Toqaev.
