Prezıdent tapsyrmalarynyń oryndalýy arnaıy monıtorıng arqyly baqylanady
«Bizdiń qoǵamdyq uıym bıyl jyl basynda quryldy. Maqsat – Prezıdent júktegen tapsyrmalardyń oryndalý barysyn qadaǵalaý. Jumysqa ekonomıkalyq yntymaqtastyq jáne damý uıymy elderiniń tájirıbesi men ádis-tásiline súıene otyryp kiristik. Qoǵam tarapynan baqylaý júrgizip, taldaý jasaý jumystyń tıimdiligin arttyrady. Árıne, ol úshin qoǵam belsendilik tanytý kerek. Taǵy bir mańyzdy jaıt kez kelgen qoǵamdyq máseleni sheshý úshin kóshege shyǵýdyń nemese aıqaı-shý shyǵarý mindetti emes. Bılik pen halyq bir-birin estı bilgen jón. Bizdiń mindet halyqtyń muń-muqtajyn Úkimetke jetkizý jáne problemanyń sheshilýin qadaǵalaý», - dedi «El namysy» arnaıy monıtorıngilik tobynyń tóraǵasy Rafael Gasanov Ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, atalǵan qoǵamdyq uıym jumysyna kez kelgen belsendi azamat óz úlesin qosa alady.
«Bizdiń baqylaýymyzǵa Prezıdent jarııalaǵan aýqymdy reformalardan bastap, áleýmettik máselelerge deıin kiredi. Olardyń qataryna ádil sot sheshimi; saılaýdyń ádil ótýi; halyq óz oıyn beıbit mınıngiler ótkizý arqyly jetkize bilýi — taǵy sol sııaqty máseleler kiredi. Qurylǵan 4 aıdyń ishinde «El namysy» arnaıy monıtorıng tobyna erikti múshelerdiń sany elimiz boıynsha 1 myńnan asty. Bas shtabymyz elordada ornalasqan. Sonymen qatar oblys, aýdan jáne aýyl deńgeıinde ókildikterimiz jumys isteıdi. Biz memlekettik organdardyń jumysyn teksermeımiz jáne baǵa bermeımiz. Biz Úkimetke júktelgen mindettiń ýaqytyly oryndalýyn qadaǵalaımyz, monıtorıng júrgizemiz», - deıdi ol.
Monıtorıngilik top basshysynyń málimdeýinshe, qoǵamdyq uıymǵa aqparat elimizdiń túkpir-túkpirinen kelip túsedi.
«Az ýaqyt ishinde elimizde sheshimin tappaı kele jatqan túıtkildi máseleler zerdelendi. Máseleler túrli salany qamtıdy. Búginde ol boıynsha Úkimetke tıisti usynymdar berildi», - dedi R. Gasanov.
