Prezıdent tapsyrmasymen Zaısan aýdanynda salynyp jatqan áýejaı qurylysy qashan aıaqtalady
ÓSKEMEN. KAZINFORM – Shyǵys Qazaqstan oblysy Zaısan aýdanynda salynyp jatqan áýejaı qurylysynyń 65 paıyzy aıaqtaldy.
Byltyr Memleket basshysy Qasym-Jomart Toqaevtyń tapsyrmasyna sáıkes Shyǵys Qazaqstandaǵy Katonqaraǵaı men Zaısan aýdandarynda áýejaı qurylysy bastalǵan bolatyn.
Qazir Zaısannyń Sátbaı aýylyndaǵy nysanda jumys birqalypty júrip jatyr.
- Búginde áýejaı qurylysynyń 65 paıyzy aıaqtaldy. Uzyndyǵy 2200 metrge jetetin ushý-qoný jolaǵy tolyǵymen salynyp bitti. Atalǵan jobany iske asyrý nátıjesinde aldaǵy ýaqytta Qytaıdyń Úrimshi qalasyna, Altaı aımaǵyna halyqaralyq áýe reısterin jáne Astana, Almaty jáne Óskemen qalalaryna ishki áýe qatynastaryn ashý kózdelip otyr, - dep habarlady ShQO ákimdiginen.
Jospar boıynsha osy jyldyń mamyr-maýsym aılarynda áýejaı óz jumysyn bastaýy tıis. Qazir áýejaı qurylysynda 200-ge jýyq adam jumys istep jatyr.
Eske salsaq, osyǵan deıin Pavlodar áýejaıy qaıtarylǵan aktıvter esebinen rekonstrýktsııalanatyndyǵy habarlanǵan.