Prezıdent tapsyrmasymen salynatyn 20 sý qoımanyń alǵashqysy aıaqtalýǵa jaqyn
TÚRKІSTAN. KAZINFORM – Túrkistan oblysynyń Báıdibek aýdanynda táýelsizdik jyldarynan bergi eń alǵashqy sý qoımasy salynyp jatyr. Qurylysy bitse, Bógen ózeniniń tómengi aǵysynda ornalasqan Sarqyrama, Shaldar aýyldary jazda sýdan tapshylyq kórmeıdi. Osylaısha egistik jer kólemi de ulǵaımaq. Bul - elimizdegi sý qaýipsizdigin qamtamasyz etý maqsatynda salynatyn 20 sý qoımanyń alǵashqysy.
Aqbastaý aýyldyq okrýgi aýmaǵynan salynyp jatqan «Báıdibek-Ata» sý qoımasynyń strategııalyq mańyzy joǵary. Qurylysy byltyr qazan aıynda bastalǵan nysan 2025 jyldyń jeltoqsan aıyna deıin qoldanysqa beriledi.
Dambanyń bıiktigi - 26 metr, uzyndyǵy 4,2 shaqyrymdy quraıdy. Al sý qoımanyń jalpy sý syıymdylyǵy - 68 mln m3. Jobanyń quny 15 mlrd teńgeden asady.
— Búgingi tańda negizgi bógettiń jer jumystary jáne 20 shaqyrymdy quraıtyn arnany betondaý jumystary júrgizilip jatyr. Nysan basyna 148 adam men 161 tehnıka jumyldyrylǵan. Sonymen qatar sapasyn baqylaý úshin arnaıy labaratorııa, tehnıkalyq jáne avtorlyq qadaǵalaýshy mekemeler nysan basyna ornalastyrylyp, tıisti jumystar atqarylýda, - deıdi ınjenerler.
Aıta keteıik, Prezıdent tapsyrmasymen 2,5 mlrd tekshe metrge deıin sý jınaı alatyn 20 jańa sý qoıma Aqmola, Batys Qazaqstan, Jambyl, Qyzylorda, Túrkistan men Jetisý oblystarynda salynady dep josparlanǵan.
Altynbek Ámıt
