Prezıdent tapsyrmasy: jas ǵalymdar baspanaly boldy
ASTANA. KAZINFORM - Búgin Bilim kúnine oraı QR Ǵylym jáne joǵary bilim mınıstriniń m.a. Saıasat Nurbek Memleket basshysynyń tapsyrmasy boıynsha bes jas ǵalymǵa páter sertıfıkattaryn saltanatty túrde tabystady, dep habarlaıdy mınıstrliktiń baspasóz qyzmeti.
Atalǵan shara Prezıdenttiń 2024 jylǵy 31 mamyrda Ǵylym ordasynda jas ǵalymdarmen kezdesýinde bergen tapsyrmasyn oryndaý maqsatynda uıymdastyryldy.
Onyń negizgi maqsaty – jas ǵalymdardy áleýmettik qoldaý, olardyń áleýmettik mártebesin arttyrý jáne ǵylym salasyna jas kadrlardy tartýǵa jaǵdaı jasaý. Osy maqsatta Komıssııa Astana jáne Almaty qalalaryndaǵy ǵylymı uıymdar men joǵary jáne joǵary oqý ornynan keıingi bilim berý uıymdarynda eńbek etetin jas ǵalymdar arasynan baspanamen qamtamasyz etýge úmitkerlerdiń kezekti tizimin aıqyndady.
-Búgingi aıtýly kúni Memleket basshysynyń tapsyrmasy boıynsha bes jas ǵalymǵa páter sertıfıkattaryn saltanatty túrde tabystap otyrmyz. Bul – memleket tarapynan ǵylym salasynda eńbek etip júrgen jas zertteýshilerge kórsetilip otyrǵan naqty qoldaýdyń mańyzdy bir kórinisi. Sizder búgin turǵyn úıge óteýsiz negizde qol jetkizýge múmkindik beretin páter sertıfıkattarynyń ıegeri atanyp otyrsyzdar. Osy qýanyshty sát barshańyzǵa qutty bolsyn! Prezıdent jas ǵalymdardy qoldaýǵa, olardyń ǵylymı áleýetin damytýǵa jáne áleýmettik jaǵdaıyn jaqsartýǵa erekshe mán berip keledi. Osy baǵytta óteýsiz negizde beriletin páter sertıfıkattarymen qatar «Otbasy banki» arqyly júzege asyrylatyn jeńildetilgen turǵyn úı baǵdarlamalary da jas zertteýshilerdiń baspanaly bolýyna múmkindik beredi. Mundaı sharalar jas ǵalymdarǵa áleýmettik jaǵdaıyn jaqsartyp qana qoımaı, ǵylymı izdenisterine alańsyz kóńil bólip, elimizdiń ǵylymy men tehnologııasynyń damýyna úles qosýyna jaǵdaı jasaýǵa baǵyttalǵan», - dedi S. Nurbek.
Osyǵan deıin Prezıdent agrarlyq sala ǵalymdaryn marapattap, baspana kiltin tabystaǵan bolatyn.
