Prezıdent tapsyrmasy: Úkimet avıakerosın baǵasyn qalaı rettemek

ASTANA. KAZINFORM – Búgin Úkimet úıinde avıkerosın baǵasynyń qymbattaýyna qatysty qandaı is-shara qabyldanyp jatqany aıtyldy.

Kólik vıtse-mınıstri Talǵat Lastaevtyń aıtýynsha, búginde elimizde 730-740 myń tonna avıa otyn óndiriledi, onyń 630 myń tonnasy azamattyq avıatsııaǵa, al 100 myń tonna avıa otyn memlekettik avıatsııa jumsalady. 

- Jalpy 1 mln tonna avıa otyn qajet, bul suranysty 2030 jylǵa deıin tolyq jabýdy josparlanyp otyrmyz, - dedi Talǵat Lastaev Úkimet otyrysynan keıin ótken baspasóz máslıhatynda. 

Spıker málimdegendeı, qazir Básekelestikti qorǵaý jáne damytý agenttigi Energetıka mınıstrligimen birlesip avıa otyn baǵasyn retteýge qatysty keshendi sharalar ázirlep jatyr. 

— Aldymen otandyq avıakerosın óndirisiniń kólemin ulǵaıtý kerek. Kelesi kerosındi jetkizýdiń balamaly kózderi bolý úshin jańa standarttarǵa kóshý qajet, ıaǵnı batys elderinde óndiriletin JetA-1, KO-1 standarty ǵana emes, basqa da standarttardy ımporttaý múmkindigin qarastyrý. Úshinshiden, ortadaǵy deldaldar problemasyn sheshý, sonda janar-jaǵarmaı áýejaıǵa tikeleı túsedi, tıisinshe ústeme aqy avıakompanııalarǵa arzanǵa túsedi, - dep túsindirdi Kólik vıtse-mınıstri. 

Eske sala ketsek, jyl basynda Prezıdent Úkimetke Astana áýejaıyndaǵy avıakerosınniń baǵasyn retteýdi tapsyrǵan edi. 

- Shuǵyl atqaratyn sharýanyń biri – elimizdiń aýmaǵynda halyqaralyq áýe habyn qurý. Іri áýejaılarymyzdy básekege qabiletti halyqaralyq habqa aınaldyrý úshin tez arada batyl sheshimder qabyldaý qajet. Aldymyzda júk jáne jolaýshylar termınaldary, logıstıkalyq ortalyqtary jáne zamanaýı servısteri bar tolyqqandy ekojúıe qurý mindeti tur. Júk tasymalynyń barlyq rásimin jeńildetip, avıaotynǵa qoljetimdi baǵa qoıý kerek. Keıingi másele óte ózekti, - degen Memleket basshysy avıakerosınniń baǵasyna jeke toqtalǵan edi.