Prezıdent tapsyrmasy: ShQO-daǵy eki áýejaıdyń qurylys qarqyny qandaı
ÓSKEMEN. KAZINFORM — Shyǵys Qazaqstan oblysynda Memleket basshysy Qasym-Jomart Toqaevtyń tapsyrmasymen Zaısan jáne Katonqaraǵaı aýdandarynda áýejaılar salý jumystary jalǵasyp jatyr.
Qazirgi tańda Zaısan áýejaıynyń qurylysy 76 paıyzǵa aıaqtalǵan. Áýeaılaqtyń negizgi bóligi — ushý-qoný jolaǵy, perron jáne rýldeý joly tolyq salynyp bitti. Qazir ǵımarattar, ınjenerlik ınfraqurylym, avtojoldar men aýmaqty qorshaý jumystary júrgizilip jatyr.
— Katonqaraǵaı aýdanyndaǵy áýejaı qurylysy 55 paıyzǵa oryndalǵan. Qazirgi ýaqytta jasandy ushý-qoný jolaǵyna asfaltbeton jabynynyń ekinshi qabatyn tóseý, ǵımarattar men ınjenerlik jeliler salý, kireberis joldar men perımetrlik qorshaý ornatý jumystary atqarylyp jatyr, — dep habarlady ShQO ákimdiginen.
Jospar boıynsha Zaısan áýejaıynyń qurylysy osy jazda, al Katonqaraǵaıdaǵy áýejaıdyń qurylysy kúzdiń basynda aıaqtalmaq. Al qajetti sertıfıkattaý rásimderinen keıin eki áýejaıdy da tolyq paıdalanýǵa berý jyl sońyna deıin josparlanǵan.
Ár nysanda 57 turaqty jumys orny ashylady. Qurylys kezeńinde 320 adam maýsymdyq jumyspen qamtylǵan. Jańa áýejaılardyń operatorlyq qyzmetin «Óskemen áýejaıy» AQ atqarady.
Eske salsaq, buǵan deıin astananyń ekinshi áýejaıy qaı aýdanda salynýy múmkin ekendigi habarlanǵan.
