Prezıdent tapsyrmasy: Óskemende jańa jylý elektr ortalyǵy qaıda salynady
ÓSKEMEN. KAZINFORM — Óskemen qalasynda 130 myń abonentti jylýmen qamtamasyz etetin JEO-3 qurylysy jobasyn iske asyrýǵa daıyndyq júrgizilip jatyr.
Jańa jylý kózinen óndiriletin jylýdyń negizgi bóligi qalanyń sol jaǵalaýyna baǵyttalady. Qazir bul aýmaqta turǵyn úıler men áleýmettik nysandardyń qurylysy qarqyndy júrip jatyr.
Ortalyqtyń iske qosylýy jańadan boı kóterip jatqan shaǵyn aýdandardy jylýmen qamtyp qana qoımaı, qalanyń jylý qýaty tapshylyǵy máselesin aldaǵy ondaǵan jylǵa sheshýge jáne qoldanystaǵy jylý jelilerine túsetin júktemeni azaıtýǵa múmkindik beredi.
Qurylys jumystary Qasym Qaısenov kentine qarama-qarsy jer ýchaskesinde júrgizilmek. Jerdiń jalpy aýmaǵy — 286,6 gektar. Qazir munda mamandar jumys istep jatyr. Bolashaq ınjenerlik kommýnıkatsııalardyń negizgi toraptary aıqyndalyp, aýmaqty qorshaý jáne qurylysshylarǵa arnalǵan ýaqytsha qalashyqty uıymdastyrý jumystary júrgizilip jatyr.
— Qazir aýmaqty qurylysqa daıyndaý jumystaryna belsendi kiristik. Jobalaý kezeńin 2026 jyldyń sońyna deıin aıaqtaýdy josparlap otyrmyz, — dep habarlady ShQO energetıka jáne turǵyn úı-kommýnaldyq sharýashylyq basqarmasynan.
Ortalyq qurylysy Memleket basshysynyń tapsyrmasy aıasynda júzege asyrylyp jatyr. Jobany qarjylandyrý men qurylys jumystaryn «Óskemen Energo» JShS ınvestor retinde óz mindetine alǵan. Josparǵa sáıkes, iske qosý-baptaý jumystary júrgizilip, nysandy ónerkásiptik paıdalanýǵa berý 2029 jyldyń jeltoqsan aıyna belgilengen.
Eske salsaq, osyǵan deıin Pavlodarda JEO murjasynan býdaqtaǵan qara tútin jurtty shoshytqany habarlanǵan.
