Prezıdent tapsyrmasy oryndaldy: Shymkentte 150 oryndyq ońaltý ortalyǵy ashyldy
ShYMKENT. KAZINFORM – Shymkentte múgedektigi bar azamattarǵa arnalǵan 150 oryndyq jańa ońaltý ortalyǵy ashyldy. Іs-sharaǵa qala ákimi Ǵabıt Syzdyqbekov qatysty.
Jańa áleýmettik nysan Memleket basshysynyń tapsyrmasyna sáıkes, zamanaýı ońaltý ortalyqtarynyń jelisin damytý aıasynda, Bozaryq shaǵynaýdanynda salyndy. Qurylysy 2024 jyldyń jeltoqsanynda bastalyp, merziminen buryn aıaqtalyp otyr.
Nysan 5,3 gektar aýmaqta ornalasqan. Ǵımarattardyń jalpy aýdany shamamen 22 myń sharshy metrdi quraıdy. Keshen medıtsınalyq, ońaltý, sporttyq, áleýmettik jáne turǵyn ınfraqurylymdy biriktiretin bes bloktan turady.
Ortalyq I jáne II toptaǵy múgedektigi bar azamattarǵa jartylaı statsıonarlyq formatta arnaýly áleýmettik qyzmet kórsetýge arnalǵan.
Qala ákimi ortalyqtyń ashylýy Memleket basshysynyń tapsyrmasyn oryndaýdyń mańyzdy nátıjesi ekenin atap ótip, onyń qala turǵyndaryna sapaly ońaltý kómegin alýǵa múmkindik beretinin aıtty.
– Prezıdenttiń tapsyrmasyna sáıkes Shymkentte múgedektigi bar azamattar keshendi kómek alyp, qolaıly jaǵdaıda ońaltýdan óte alatyn zamanaýı ortalyq ashyldy. Munda densaýlyqty qalpyna keltirýge, áleýmettik beıimdelýge jáne belsendi ómirge oralýǵa barlyq múmkindik jasalǵan, – dedi Ǵabıt Syzdyqbekov.
Keshen quramynda úsh qabatty ońaltý korpýsy, emdik-saýyqtyrý basseıni, sport jáne akt zaldary, eki qabatty statsıonar, ashana, sheberhanalar jáne basqa da qajet bólmeler qarastyrylǵan.
Ońaltý korpýsynda dárigerler men mamandardyń kabınetteri, fızıoterapııa, mehanoterapııa, massaj, sýmen emdeý, logopedııalyq jáne psıhologııalyq kómek kórsetýge arnalǵan bólmeler ornalasqan. Áleýmettik jáne eńbekke beıimdeý maqsatynda tigin, qysh jáne slesarlyq sheberhanalar, shyǵarmashylyqpen aınalysýǵa arnalǵan bólmeler men kitaphana qarastyrylǵan.
Dene ońaltýyna da erekshe kóńil bólingen. Emdik-saýyqtyrý basseıni bir mezette – 46 adamǵa deıin, al sport zaly 25 adamǵa deıin qabyldaı alady. Akt zaly 150 orynǵa eseptelgen, onyń ishinde múgedektigi bar adamdar paıdalanatyn arbalarǵa arnalǵan 40 oryn bar.
Qyzmet alýshylardyń ýaqytsha turýy úshin bir jáne eki oryndy bólmelerden turatyn eki qabatty statsıonar jasaqtalǵan. Olardyń arasynda múgedek arbasyn paıdalanatyn azamattarǵa arnaıy beıimdelgen bólmeler de bar.
Ortalyq otandyq jáne sheteldik óndiristiń zamanaýı medıtsınalyq jabdyqtarymen, onyń ishinde arnaıy tehnıkamen qamtamasyz etilgen. Qajet protsedýralar aıaqtalǵan soń ortalyq azamattardy qabyldaýdy bastaıdy.
Aıta keteıik, ortalyqtyń ashylýy Shymkent turǵyndarynyń ońaltý jáne arnaýly áleýmettik qyzmetterge qoljetimdiligin keńeıtip, múgedektigi bar azamattardyń densaýlyǵyn qalpyna keltirýi men áleýmettik beıimdelýine qosymsha múmkindik beredi.
