Prezıdent tapsyrmasy oryndaldy: 90 qala men 6 087 aýyl aýyz sýmen 100 paıyz qamtyldy
ASTANA. KAZINFORM — Elimizdegi 90 qala men 7,5 mıllıon turǵyny bar 6 087 aýyl aýyz sýmen 100 paıyz tolyq qamtamasyz etildi. Bul týraly búgin Úkimet otyrysynda Ónerkásip jáne qurylys vıtse-mınıstri Qýandyq Qajkenov aıtty.
— Memleket basshysynyń 2025 jyldyń sońyna deıin halyqty tolyǵymen aýyz sýmen qamtamasyz etý jónindegi tapsyrmasyna sáıkes, sýmen jabdyqtaý ınfraqurylymyn damytý boıynsha keshendi jumys júrgizildi. Osy jyldary aralyǵynda bıýdjetten shamamen 835 mıllıard teńge, onyń ishinde arnaı memlekettik qordan 132 mıllıard teńge bólinip, 1,6 myńnan astam joba iske asyryldy, ıaǵnı Úkimet tarapynan qarjylandyrý máselesi tolyǵymen sheshildi, — dedi vıtse-mınıstr.
Onyń dereginshe, júrgizilgen jumystardyń nátıjesinde 34 qala men 756 aýyl ortalyq sý júıesimen qamtyldy. Sonymen qatar, jergilikti bıýdjet esebinen 699 aýylda keshendi blok-modýlder ornatyldy.
— Salystyrmaly túrde, 2021 jyly aýyl halqynyń 90 paıyzy jáne qala halqynyń 97,5 paıyzy sýmen jabdyqtaý qyzmetterine qol jetkizdi. Osylaısha, jergilikti atqarýshy organdardyń aqparatyna sáıkes, Memleket basshysynyń tapsyrmasy tolyq oryndalyp, elimizdegi 90 qala men 7,5 mıllıon turǵyny bar 6 087 aýyl aýyz sýmen 100 paıyz tolyq qamtamasyz etilip otyr, — dedi Qýandyq Qajkenov.
Vıtse-mınıstr dereginshe:
— 4 747-si ortalyq sý júıesimen;
— 1 340 aýyl ortalyqtandyrylmaǵan sý júıesimen qamtylǵan, onyń ishinde:
— 1 102 aýyl sýdy tazartý blok-modýlderi arqyly qamtamasyz etilgen;
— 219 halqy az eldi mekende sýmen jabdyqtaý uńǵymalar esebinen júzege asyrylady;
— 19 eldi mekende shalǵaı ornalasýyna jáne sý kózderiniń bolmaýyna baılanysty aýyz sý tasymaldaý arqyly jetkiziledi. Atalǵan eldi mekenderde orta eseppen 70 adamnan turady. Ártúrli sýmen jabdyqtaý tásilderi tek qoljetimdilikti qamtamasyz etip qana qoımaı, qarjylyq shyǵyndardy tıimdi paıdalanýǵa múmkindik berdi.
— Jumys barysynda sýmen jabdyqtaý sapasyna aıryqsha basymdyq berilip, magıstraldyq qubyrlar men sý tazartý qurylystary da jańǵyrtyldy. Barlyǵy 9,5 myń shaqyrym jeli qaıta jańartylyp, keńeıtildi. Onyń ishinde qalalarǵa qatysy 1,8 myń shaqyrym, aýyldarda 7,7 myń shaqyrym sý jelileri jańǵyrtyldy. Nátıjesinde jelilerdiń tozýy deńgeıi 38 paıyzǵa deıin tómendedi, — dedi vıtse-mınıstr.
Aıta keteıik, Úkimet otyrysynda sýmen jabdyqtaý jáne sý burý júıelerin damytý, tsıfrlandyrý men sý únemdeý tehnologııalaryn engizý sharalaryn talqyǵa salynyp jatyr.