Prezıdent tapsyrmasy: Q.Sátbaev atyndaǵy kanalda tórt jańa transformator iske qosyldy
ASTANA. KAZINFORM - «Qazsýshar» RMK-nyń «Q. Sátbaev atyndaǵy kanal» fılıaly jeti jańa transformatordy jınaqtaý jáne paıdalanýǵa berý jumystaryn júrgizip jatyr. Sý resýrstary jáne ırrıgatsııa mınıstri Nurjan Nurjigitov fılıaldyń 2025 jyldyń basynan beri atqarǵan jumysy týraly esebin tyńdady.
Búginde kanalda tórt jańa transformator iske qosyldy. Al qalǵan úsheýin 2026 jyly paıdalanýǵa berý josparlanyp otyr. Nysandy keshendi qaıta jańǵyrtý jónindegi Jol kartasyna sáıkes, 2028 jyldyń sońyna deıin Q. Sátbaev atyndaǵy kanalda barlyǵy 17 jańa transformator ornatylyp, 19 nasos qondyrǵysy aýystyrylady. 2025 jyldyń sońyna deıin kanalda tórt nasos qondyrǵysyn aýystyrý josparlanǵan. Qazirgi ýaqytta olardyń ekeýin ornatý jumystary bastaldy.
- Memleket basshysynyń Q. Sátbaev atyndaǵy kanaldy jańǵyrtý jáne rekonstrýktsııalaý jónindegi tapsyrmasy belgilengen kestege saı júzege asyrylyp jatyr. Nysandaǵy jumystar sý resýrstaryna degen suranystyń artýyna baılanysty júrgizilip jatyr. Joba eldi mekender men ónerkásip oryndaryn sýmen jabdyqtaý sapasyn jaqsartady. Sondaı-aq kanaldyń uzaq merzimdi ári qaýipsiz jumys isteýin qamtamasyz etedi,-– dedi Sý resýrstary jáne ırrıgatsııa vıtse-mınıstri Erbolat Ibraıhanov.
Osyǵan deıin Sý resýrstary salasynda ÚEU-men yntymaqtastyqty damytýǵa arnalǵan jańa keńes qurylǵany týraly jazdyq.