Prezıdent tapsyrmasy: Kóktemgi egis jumystary erterek qarjylandyrylady
ASTANA. KAZINFORM – Jaqynda Memleket basshysy agroónerkásip keshenin nyǵaıtý baǵytynda naqty mindetter júktegen edi. Búgin Úkimet otyrysynda Aýyl sharýashylyǵy vıtse-mınıstri Azat Sultanov atqarylǵan sharalar týraly baıandady.
Onyń aıtýynsha, 2025 jylǵy kóktemgi egis jáne egin jınaý jumystaryn qarjylandyrý kólemin 100 mlrd teńgege jetkizý josparlanýda.
«Kórsetilgen kólemdegi qarajatty qamtamasyz etý maqsatynda 2025 jylǵa arnalǵan bıýdjet jobasynda 45 mlrd teńge kózdeldi, qosymsha qajettilik – 71,9 mlrd teńgeni quraıdy. Sondaı-aq, Prezıdenttiń qarjylandyrýdy bıylǵy jeltoqsan aıynda bastaý tapsyrmasyn oryndaý úshin Úkimet qaýlysynyń jobasy ázirlendi. Ol búgingi Úkimet otyrysynyń qaraýyna shyǵarylady», - dedi vıtse-mınıstr.
Bul sheshimdi kútpeı-aq, Agrarlyq nesıe korporatsııasy 29 qarashadan bastap, 100 mlrd teńge mólsherinde qarjylandyrýdy bastaıdy.
«Qazirdiń ózinde 500-den asa aýyl sharýashylyǵy taýaryn óndirýshilerden ótinim kelip tústi. Qarajat fermerlerge ekinshi deńgeıli bankter, kredıttik seriktester, áleýmettik kásipkerlik korporatsııalar jáne agrarlyq nesıe korporatsııasy arqyly qoljetimdi bolady. Bul jerde bıyl baǵdarlamaǵa tek 7 ÁKK qatysqanyn aıta ketken jón. Sharýalardyń ózderiniń suraýymen kelesi jyly barlyq óńirlerden áleýmettik-kásipkerlik korporatsııalardy tartý kerek», - dedi A. Sultanov.
Salany uzaqmerzimdi jáne qoljetimdi jeńildetilgen kredıt berýge kóshire otyryp, fermerlerdi kredıttik-sýbsıdııalaý júıesi qaıta qaralady.
«Bul bıýdjet qarajaty bolmaǵan jaǵdaıda týyndaıtyn agrobıznes táýekelderin tómendetýge múmkindik beredi. Sondaı-aq, qarjylandyrý bolmaǵan kezde kredıt berýdi shekteý qaıta qaralady, ol bıznestiń narazylyq kórsetýine jol bermeıdi. Mysaly, Damý qory arqyly qaryzdardy sýbsıdııalaý tetigi jumys isteıdi. Kórsetilgen sharalar jekeshe bankterden agroónerkásiptik keshenge kredıt berýge de tartýǵa múmkindik beredi», - dep túsindirdi sala mamany.
Óz kezeginde Premer-Mınıstr Oljas Bektenov jeńildikti qarjylandyrý jáne ónimdi tıimdi ótkizý eginshiler úshin asa mańyzdy másele ekenin aıtty.
«Biz 2025 jylǵy kóktemgi egis jáne jıyn-terin jumystaryn erterek qarjylandyrý qajet ekenin aıttyq. Aýyl sharýashylyǵy mınıstrligi men «Báıterek» holdıngine tez arada ótinimder pýlyn jınaqtap, 1 jeltoqsannan bastap qarjylandyrý jumystaryna kirisýdi tapsyramyn. 10-aq kún qaldy tezdetińizder», - dedi Úkimet basshysy.
Al Azyq-túlik korporatsııasy fermerlerden astyqty qolaıly baǵamen tikeleı satyp alýdy qamtamasyz etýi kerek.
