Prezıdent tapsyrmasy: ınflıatsııany tejep, ony meılinshe tómen deńgeıge jetkizý kerek
ASTANA. KAZINFORM — Úkimet eldiń ornyqty damýyn qamtamasyz etý úshin barynsha belsendi jáne shıraq jumys isteýi tıis. Bul týraly Parlament palatalarynyń birlesken otyrysynda Memleket basshysy Qasym-Jomart Toqaev málim etti.
— Halyqaralyq ahýal ýaqyt ótken saıyn kúrdelenip, qubylyp, turaqsyzdyq beleń alǵanyn kórip, bilip otyrsyzdar. Bul jaǵdaı jahandyq ekonomıkaǵa orasan zardabyn tıgizip jatyr. Halyqaralyq valıýta qory men Birikken Ulttar Uıymynyń quzyrly agenttikteriniń boljamy boıynsha aldaǵy eki jylda álem qaýymdastyǵy, sonyń ishinde jekelegen memleketter ekonomıkalyq josparlaryn júzege asyrý kezinde edáýir qıyndyqqa tap bolýy múmkin. Biraq eńseni túsirip, úreıge boı aldyrýǵa bolmaıdy, — dedi Qasym-Jomart Toqaev.
Osy oraıda Prezıdent Úkimet eldiń ornyqty damýyn qamtamasyz etý úshin barynsha belsendi jáne shıraq jumys isteýi tıis ekenin aıtty.
— Inflıatsııany tejep, ony meılinshe tómen deńgeıge jetkizgen jón, sondaı-aq ekonomıkanyń qarqynyn tómendetpeı, kerisinshe, onyń kórsetkishterin ulǵaıtý qajet, — dedi Memleket basshysy.
Buǵan deıin habarlanǵandaı, búgin elordada Memleket basshysy Qasym-Jomart Toqaevtyń qatysýymen Parlament palatalarynyń birlesken otyrysy ótti.
