SQO-da magıstraldyq gaz qubyryn jobalaý jumystary bastaldy
PETROPAVL. KAZINFORM - Soltústik Qazaqstan oblysyn tabıǵı gazben qamtamasyz etý maqsatynda Astanadan Reseı shekarasyna deıin magıstraldyq gaz qubyryn salý boıynsha jobalaý jumystary bastaldy.
SQO ákiminiń orynbasary Nurlan Keńesov Prezıdenttiń oblysty gazdandyrý jónindegi tapsyrmasyn júzege asyrýda naqty qadam jasalǵanyn aıtty. Bul óńir turǵyndary úshin kópten kútken mańyzdy jańalyqtardyń biri. Gaz ınfraqurylymynyń damýy oblystyń áleýmettik-ekonomıkalyq áleýetin arttyryp qana qoımaı, halyqtyń turmys sapasyn jaqsartýǵa da múmkindik beredi.
- Bul - oblysymyzdyń gazǵa qol jetkizýine úlken úmit beretin mańyzdy qadam. Alda áli atqaratyn jumys kóp, gaz qubyrynyń naqty baǵytyn (trassırovkasyn) zerdelep, tehnıkalyq máselelerdi pysyqtaý qajet. Qazir jumys toby osy baǵytta belsendi jumys júrgizip jatyr. Eń bastysy - is bastaldy. Buıyrsa, aldaǵy ýaqytta oblysymyzǵa kógildir otyn da jetetin kún alys emes! – dedi oblys ákiminiń orynbasary.
Magıstraldyq gaz qubyryn salý - aýqymdy ári jaýapty joba. Sondyqtan onyń baǵytyn anyqtaý, tehnıkalyq talaptardy belgileý jáne qurylys kezeńderin josparlaý úlken daıyndyqty qajet etedi.
Mamandardyń aıtýynsha, tabıǵı gazdyń kelýi eldi mekenderdiń ınjenerlik ınfraqurylymyn damytýǵa, turǵyndardyń kómir men basqa da otyn túrlerine táýeldiligin azaıtýǵa jáne qorshaǵan ortaǵa túsetin salmaqty tómendetýge yqpal etedi.
Sonymen qatar gaz ınfraqurylymynyń qalyptasýy óńirdiń ınvestıtsııalyq tartymdylyǵyn arttyryp, jańa óndiristik jobalardy júzege asyrýǵa qosymsha múmkindik berýi múmkin.
Buǵan deıin Qazaqstanda gazdandyrý qarqyny qandaı ekenin jazǵan edik.
