Prezıdent tapsyrmasy: BQO-da shalǵaı aýyl balalary oqý jylyn jańa mektepte bastady
ORAL. KAZINFORM — Batys Qazaqstan oblysy Kaztalov aýdany Kókterek aýyldyq okrýgi Saraljyn eldi mekeninde jańa mektep paıdalanýǵa berildi.
Shalǵaı aýyldaǵy 60 oryndyq jańa mekteptiń ashylý saltanatyna BQO ákiminiń orynbasary Qaıyrjan Meńdiǵalıev, aýdan basshysy Aslanbek Sarqulov qatysyp, ustazdar men oqýshylardyń, turǵyndardyń qýanyshyna ortaqtasty.
«Osyndaı sáýleti kelisken zamanaýı jańa mekteptiń ashylýy – memleketimizdiń aýyl halqyna, aýylda týyp, aýylda ósip kele jatqan óskeleń urpaqqa tartýy. Bıyl Memleket basshysynyń tapsyrmasymen óńirde 11 mektep boı kóterip jatsa, sonyń biri – osy bilim ordasy. Jańa mektep «QPO b.v.» kompanııasynyń áleýmettik jobalary aıasynda salyndy», - dedi Q.Meńdiǵalıev.
Saraljyn eldi mekeninde Keńes Odaǵynyń Batyry Májıt Júnisov atyndaǵy negizgi orta mektebiniń eski ǵımaraty 1989 jyly salynǵan. 60 orynǵa eseptelgen jańa mekteptiń jalpy quny – 750 mln teńge. Merdigeri - «Aqsaı Stroı Servıs» JShS. Jańa oqý kabınetterimen jabdyqtalǵan mektep aýlasynda shaǵyn fýtbol alańy, basketbol, júgirý alańdary jáne demalý orny bar.
Mereke barysynda osy aýyldan túlep ushqan belgili qalamger-ustaz, «Parasat» ordeniniń ıegeri, Kaztalov aýdanynyń qurmetti azamaty Darıǵa Mushtanovanyń synyby ashyldy.
Aýdan ákimi Aslanbek Sarqulovtyń aıtýynsha, bıyl Kaztalov aýdanynda barlyǵy 5 293 oqýshy mektep esigin ashsa, sonyń 518-i birinshi synypqa bardy.
«Aýdanymyzda bıyl jabylǵan, úsh aýysymda oqıtyn mektepter joq. Muǵalimderge qajettilik máselesi sheshilip jatyr. Kaztalov aýdany Reseımen shektesetindikten, shekaralas aýyldarda bilim ordalaryn qalypty jaǵdaıda ustaýǵa da barynsha kóńil bólinýde», - dedi Kazinform tilshisine A.Sarqulov.
Eske sala keteıik, budan buryn BQO-da Bilim kúni balalar qaýipsizdigin saqtaýǵa 540-qa jýyq polıtsııa qyzmetkeri jumyldyrylǵanyn jazǵan bolatynbyz.
