Prezıdent tapsyrmasy aıasynda BQO-da 14 iri ınvestıtsııalyq joba júzege asady
ORAL. KAZINFORM — Oblysta josparlanǵan 14 jobanyń bárin bir konsortsıým atqarady, dep habarlaıdy BQO ákimdiginiń baspasóz qyzmeti.
Prezıdent Qasym-Jomart Toqaev QHR Tóraǵasy Sı Tszınpınmen kezdeskende «Qytaı — Qazaqstannyń eń iri saýda seriktesi. Ortaq iri jobalarymyz júzege asyrylyp jatyr», — dep aıtqan bolatyn.
Osyǵan oraı, Memleket basshysynyń tapsyrmasyna sáıkes, Batys Qazaqstan oblysynda qytaı kásipkerlerimen 14 ınvestıtsııalyq jobany júzege asyrý qolǵa alyndy. Kórshi eldiń ınvestorlary energetıka, aýyl sharýashylyǵy, densaýlyq saqtaý sııaqty birqatar mańyzdy salaǵa jalpy quny 134 mıllıard teńgeden astam qarjy salýǵa nıetti. Bul baǵytta eki jaqty naqty kelisim bar. Endi sanaýly kúnderden keıin eki zaýyttyń qurylysy bastalady. Oǵan qajetti qural-jabdyq tıelgen konteınerlerdiń alǵashqy legi Qytaıdyń Veıfan qalasynan elimizge qaraı jóneltildi.
Aldymen ındýstrıaldy aımaqta qýaty 34 megavatt bolatyn gaz elektr stantsııasy salynady. Bul joba keıingi óndiris oryndaryn turaqty energııamen qamtamasyz etýge baǵyttalǵan. Sonymen qatar munaı katalızatorlaryn qaıta óńdeý zaýytynyń qurylysy bastalady.
Zaýytqa qajetti qondyrǵy Qazaqstanǵa jóneltildi. Alǵashqy júkti tıeý rásimine Batys Qazaqstan oblysynyń ákimi Narıman Tóreǵalıev bastaǵan delegatsııa arnaıy qatysty.
— Memleket basshysy atap ótkendeı, biz shıkizatqa táýeldi bolmaı, óńdeý ónerkásibin, aýyl sharýashylyǵyn, óndiristi damytýǵa erekshe mán berip otyrmyz. Bul jobalar óńir ekonomıkasynyń damýyna eleýli serpin beredi, — dedi Batys Qazaqstan oblysynyń ákimi Narıman Tóreǵalıev.
Oblysta josparlanǵan 14 jobanyń bárin bir konsortsıým atqarady. Quramyndaǵy birneshe kompanııa tek energetıka salasyn ǵana emes, agrotehnıka, munaı, qurylys, densaýlyq saqtaý salalaryn da ınvestıtsııalaıdy. Jumysshy top Shandýn provıntsııasyndaǵy keshendi aralap tyń tehnologııamen tanysty.
Qytaılyq «VEGA Power» kompanııasynyń bas dırektory Ge Tszıan joba kezeń-kezeńimen júzege asyrylyp, alǵashqy kezeńde 30 mıllıon AQSh dollary kóleminde ınvestıtsııa salynatynyn atap ótti.
Sonymen qatar, búginde alǵashqy bes konteıner jóneltilgenin jáne joba tolyq júzege asqanda 10-nan astam ónim túri shyǵarylatynyn habarlady.
Oblys ákimi ınvestorlarmen kezdesý barysynda naqty talaptardy da atady, olar: kompanııalar óńirde tirkelip, salyq túsimi jergilikti bıýdjetke baǵyttalýy tıis; jergilikti kadrlar jumysqa ornalastyrylady; bolashaq mamandardy oqytý ınvestorlardyń qarajaty esebinen júrgizilýi tıis.
Sonymen qatar, óńir Qytaımen medıtsına salasy boıynsha baılanysty nyǵaıtady. Osy maqsatta delegatsııa iKang Guobin Checkup Center emhanasyna baryp, Qytaıdyń densaýlyq saqtaý júıesindegi zamanaýı ádistermen jáne medıtsınalyq qyzmet kórsetýdiń ınnovatsııalyq úlgilerimen tanysty.
Aıta ketý kerek, bıyl alǵashqy jartyjyldyqtyń qorytyndysy boıynsha Batys Qazaqstan oblysy tikeleı sheteldik ınvestıtsııalar kólemi boıynsha respýblıkada 3-orynda tur.
Bul kezdesý Qazaqstan Respýblıkasynyń Qytaı Halyq Respýblıkasyndaǵy elshiliginiń qoldaýymen uıymdastyryldy.