Prezıdent tapsyrmasy: Almatyda «Taza Qazaqstan» tujyrymdamasynyń 2029 jylǵa deıingi jospary bekitildi
ALMATY. KAZINFORM — Almatyda qalalyq máslıhattyń kezekten tys XXIX sessııasynda 2025–2029 jyldarǵa arnalǵan «Taza Qazaqstan» tujyrymdamasyn júzege asyrý boıynsha is-qımyl jospary bekitildi.
Bul qujatty Memleket basshysynyń eldegi ekologııalyq jaǵdaıdy jaqsartý jónindegi tapsyrmasyn oryndaý aıasynda qalanyń Ekologııa jáne qorshaǵan ortany qorǵaý basqarmasy ázirlegen. Jospar 2024 jyly qazanda Qazaqstan Respýblıkasy Úkimeti bekitken «Taza Qazaqstan» tujyrymdamasyna negizdelgen.
Jospar úsh negizgi baǵytty qamtıdy: ekologııalyq oılaý, ekologııalyq aǵartý jáne aqparattyq qamtý, ekologııalyq bilim berý. Qujat aıasynda aýa sapasyn avtomatty baqylaý júıelerin ornatý, qaldyqtardy qaıta óńdeý ınfraqurylymyn damytý, ekoeriktilikti qoldaý, sondaı-aq «Jasyl mektep» jáne «Jasyl keńse» jobalaryn engizý sharalary kózdelgen.
— Jospardy iske asyrý ekologııalyq mádenıetti júıeli túrde qalyptastyrýǵa, halyqtyń belsendi qatysýyna, qalalyq ortanyń turaqty jaqsarýyna jáne turǵyndardyń ómir súrý sapasynyń artýyna múmkindik beredi. Qala men turǵyndardyń múddesi úshin «Taza Qazaqstan» tujyrymdamasyn iske asyrý jónindegi Jospardy qoldaýlaryńyzdy jáne bekitýlerińizdi suraımyn, — dedi Ekologııa jáne qorshaǵan orta basqarmasynyń basshysy Mıras Gaısın.
Qalalyq máslıhat depýtattarynyń basym bóligi jobany qoldap daýys berdi.
Eske salaıyq, buǵan deıin Prezıdent Teleradıokesheni qyzmetkerleri «Taza Qazaqstan» aktsııasyna qatysqanyn jazǵanbyz.