Prezıdent tapsyrmasy: Almatyda sýmen qamtý nysandarynyń qurylysy qalaı júrip jatyr
ALMATY. KAZINFORM — Almaty qalasynyń ákimi Darhan Satybaldy megapolıstiń sýmen jabdyqtaý júıesin damytý jáne jańǵyrtýǵa baǵyttalǵan ınjenerlik ınfraqurylymnyń mańyzdy nysandaryn tekserdi.
Aqsaı ózeninde sý qoımasy, Nurlytaý shaǵyn aýdanynda sý jınaqtaý kesheni, sondaı-aq Nur Alataý shaǵyn aýdanynda rezervtik gıdrotehnıkalyq qurylǵy salynyp jatyr.
Alǵashqy nysan 1948 jyly salynǵan, keıin 2015 jyly sońǵy ret rekonstrýktsııalanǵan. Qazir ol Almaty halqynyń shamamen 20%-yn, onyń ishinde Bostandyq aýdany men Almaly, Medeý jáne Áýezov aýdandarynyń keı bólikterin sýmen qamtamasyz etip otyr.
Ákimniń aıtýynsha, mundaı stantsııalardyń turaqty jumysy qala turǵyndarynyń densaýlyǵy men qaýipsizdigine tikeleı áser etedi.
Kelesi nysan — Naýryzbaı aýdanynyń Taýjoly shaǵynaýdanyndaǵy sý tartý stantsııasynyń qurylysy. Qurylys-montaj jumystary 2025 jyldyń qarashasynda aıaqtalady dep josparlanǵan.
Joba Naýryzbaı jáne ishinara Qarasaı aýdandarynyń 100 myńnan astam turǵynyn sapaly aýyz sýmen qamtamasyz etýge múmkindik beredi.
— Sý — ómirdiń kózi. Sondyqtan mundaı jobalar ýaqytynda aıaqtalyp, barlyq standarttarǵa saı bolýy kerek, — dep atap ótti Darhan Satybaldy.
Nurlytaý shaǵynaýdanynda sý daıyndaý kesheni men sý qysymyn arttyrýǵa arnalǵan sorǵy stantsııasynyń qurylysy júrip jatyr. Bul joba Nur Alataý, Ermensaı, Remızovka, Aqtóbe jáne basqa da shaǵynaýdandardyń 45 myńnan astam turǵynyn sýmen qamtýdy jaqsartýǵa baǵyttalǵan.
Ákim jumys qarqynyn kúsheıtip, nysandy 2026 jyldyń jaz maýsymynyń sońyna deıin aıaqtaýdy tapsyrdy.
— Sýmen qamtamasyz etý — erekshe baqylaýda. Qala ósip keledi, sondyqtan Almatynyń aýqymyna saı qosymsha qýat kózderi qajet, — dedi ákim.
Jumys saparynyń sońynda qala basshysy Nur Alataý shaǵynaýdanynda salynyp jatqan rezervtik gıdrotehnıkalyq nysanda boldy. Bul joba qalanyń sýmen jabdyqtaý júıesiniń sharyqtaý kezeńderindegi turaqtylyǵyn arttyryp, búkil ınfraqurylymnyń senimdi jumysyn qamtamasyz etýge baǵyttalǵan.
Eske salaıyq, buǵan deıin Memleket basshysy Qasym-Jomart Toqaev Almaty qalasyn sýmen qamtamasyz etý jalpymemlekettik mańyzy bar basym mindet ekenin atap ótken bolatyn.