Prezıdent tapsyrmasy: Almatyda 142 kóshe jańarady
ALMATY. KAZINFORM – Almatyda «Taza Qazaqstan» aıasynda qalany kórkeıtý boıynsha aýqymdy jumystar jalǵasyp jatyr.
Almaty ákimdiginen atap ótkendeı, osy jyly jumys «qasbetten qasbetke deıin» qaǵıdaty boıynsha júrgizilip, tek tazalaý emes, búkil qalalyq ortany jańartýdy qamtıdy.
Kóriktendirý jumysyna 1 000 arnaıy tehnıka jáne shamamen 1 500 jumysshy tartylǵan. Olar qaladan 2 400 tekshe metrden astam qoqys shyǵardy.
28 sáýirde «Taza Qazaqstan» aktsııasynyń úshinshi kezeńi bastaldy. Trotýarlardy tolyq tazalaý, aǵashtardy sanıtarlyq maqsatta kesý, kóshe shamdaryn qalpyna keltirý jáne kógaldandyrý josparlanǵan.
Naýqannyń maqsaty – megapolıstiń barlyq segiz aýdanyndaǵy jalpy uzyndyǵy shamamen 355 km bolatyn 142 kósheni jańartý. Keshendi tazalaý aıasynda trotýarlardy qalpyna keltirý, shuńqyrly jóndeý, aǵashtardy sanıtarlyq maqsatta kesý, kóshe shamdaryn jóndeý jáne kógaldandyrý kózdelgen.
Almaty ákiminiń orynbasary Beıbit Shahanov bıyl baǵdarlamaǵa birqatar ózgeris engizilgenin atap ótti – endi aktsııaǵa ǵımarat ıelerin tartý kózdelgen. Ol qalany tazalaýdy ǵana emes, sonymen qatar kóshelerdiń syrtqy kelbetin jaqsartýdy da qamtıdy.
– Úı ıeleri men kásipkerler kóriktendirý tólqujatyn alǵannan keıin aýmaǵyna jaýapty bolady. Olar aımaǵynyń kelbetin – baǵanalardy, mańdaıshalardy, kireberis satyny retke keltirýge tıis. Aktsııa aıasynda 158 kóriktendirý tólqujaty berilip, 43 ákimshilik aıyppul salyndy. Ár kóshe bólimine ártúrli qurylym jaýapty – mysaly, baǵanalarǵa aýdan ákimdigi, jol men baǵdarshamdarǵa – qalalyq mobıldilik basqarmasy jaýapty. Osy jumystyń nátıjesinde qalamyz taza ári kórikti bola túsedi, - dedi Beıbit Shahanov.
Qalalyq ınfraqurylymdy jaqsartýdaǵy mańyzdy qadamnyń biri – kólemi ulǵaıtylǵan 12 myńnan astam qoqys jáshigin ornatý boldy. Sonymen qatar kógaldardaǵy topyraqty óńdeý jumystary júrgizilip jatyr. Bul kógaldy aımaqtardyń qys mezgilinen keıin tezirek qalpyna kelýine kómektesedi.
Eske salaıyq, Prezıdent Qasym-Jomart Toqaev Almatyǵa jumys sapary kezinde qala ákimi Erbolat Dosaevty qabyldap, shahardy jaryqtandyrý, páterlerge sýdy ýaqtyly jáne tolyq berý, kósheler men aýlalardy abattandyrý boıynsha birqatar tapsyrma bergen bolatyn.
Sondaı-aq Prezıdent Ákimshiligi Almaty ákimi qyzmetiniń tıimdiligine saraptama júrgizetini týraly jazǵanbyz.