Prezıdent tapsyrmasy: Almatyda 109,2 shaqyrym jańa jaryqtandyrý jelisi paıda bolady
ALMATY. KAZINFORM — Almatyda buryn jaryqtandyrylmaǵan 339 ýchaskede jańa jaryq jelileri salynady.
Almatyda syrtqy jaryqtandyrý sapasyn arttyrý maqsatynda 84 jaryqsyz ýchaskede 16 km jańa jeli qurylysy bastaldy. 2025 jyly 25 sáýirde 255 ýchaskede 93,2 km jaryq jelilerin salýǵa baıqaý jarııalandy.
Almaty ákimdiginen atap ótkendeı, bul týraly qala ákimi Erbolat Dosaevtyń 2025 jylǵy 1-30 sáýir aralyǵyndaǵy Prezıdentke bergen esebinde aıtylǵan.
Qaladaǵy 7 magıstraldy kóshede 19,6 km jaryq jelisi jańartylyp, 400 jańa sham ornatyldy. Sonymen qatar 1,1 myń sham aýystyryldy. Osylaısha, olardyń qýaty eki esege artty.
— Sondaı-aq jaryqtandyrý sapasyn arttyrý úshin jańartýdy qajet etetin 1 100 basqarý shkafynyń 320-sy jańartyldy. Bıyl bul kórsetkish 70%-ǵa jetpek. Bul júıeniń senimdiligi men jedeldigin edáýir arttyrady, — delingen esepte.
2025 jyldyń basynan bastap Respýblıka alańyndaǵy eki ǵımarat pen QR Qarýly kúshteriniń áskerı-tarıhı mýzeıinde sáýlettik jaryq ornatyldy. 2024 jyly mundaı jaryqtandyrý 25 nysanda júzege asyrylǵan.
Eske salaıyq, Prezıdent Qasym-Jomart Toqaev Almatyǵa jumys sapary kezinde qala ákimi Erbolat Dosaevty qabyldap, shahardy jaryqtandyrý, páterlerge sýdy ýaqtyly jáne tolyq berý, kósheler men aýlalardy abattandyrý boıynsha birqatar tapsyrma bergen bolatyn.
Sondaı-aq Prezıdent Ákimshiligi Almaty ákimi qyzmetiniń tıimdiligine saraptama júrgizetini týraly jazǵanbyz.