Prezıdent tapsyrmasy: Almaty saıabaqtarynda 6 myńǵa jýyq sham ornatylady
ALMATY. KAZINFORM - Almatyda osy jyldyń 4 aıynda mamandar 12 myńnan astam jaryq núktelerin aýystyryp, 450 jańa tirek ornatyp, 110 shaqyrym kabel júrgizgen.
«Almaty Qala Jaryq» mekemesiniń basshysy Igor Mysıktyń aıtýynsha, saıabaqtarda, kóshelerde jáne trotýarlardyń boıynda qala turǵyndarynyń jaılylyǵy men qaýipsizdigin arttyrý úshin 5700-den astam torsher shamdary ornatylady. Sondaı-aq Almatynyń 70 kórnekti nysanynda sáýlettik jaryqtandyrý qamtamasyz etiledi.
- 2025 jyly qalada 1200-den astam jańa syrtqy jaryqtandyrý jelileri salynady - bul ótken jylmen salystyrǵanda 10 ese kóp, - dedi ol.
Naýryz aıynda Almatynyń 7 negizgi kóshesinde: Ál-Farabı, Tóle bı, Seıfýllın, Abaı, Nazarbaev, Áýezov jáne Naýryzbaı batyr kóshelerinde jaryqtandyrýdy aýqymdy jańǵyrtý jumystary bastalǵan. Bul kóshelerde 3 myńǵa jýyq jaryq núktelerin aýystyrý jáne 1 myńnan astam trotýar tirekterin ornatý josparlanyp otyr.
Al Uly Jeńistiń 80 jyldyǵyna oraı 28-gvardııashy-panfılovshylar saıabaǵynda 45 sham aýystyryldy. Áskerler úıiniń janynda qosymsha jaryqtandyrý tirekteri men sáýlettik jaryqtandyrý ornatyldy.
«Almaty Qala Jaryq» basshysy mamyr aıynyń basynda Kishi Almaty ózeni boıyndaǵy shamamen 5 shaqyrym kabeldi aýystyrý bastalǵanyn atap ótti.
- Al Jetisý aýdanyndaǵy Úlken Almaty kanalynyń boıynda jańa jaryqtandyrý jelisiniń qurylysy júrgizilip jatyr. Uzyndyǵy 1,3 shaqyrym ýchaskede 34 tirek ornatylady. Munda buryn-sońdy jaryq bolmaǵan. Dýlatı kóshesiniń boıyndaǵy avtoturaqqa 32 jaryqtandyrý tiregin ornatý jumystary aıaqtaldy, - dedi ol.
Eske salaıyq, buǵan deıin Almatyda 109,2 shaqyrym jańa jaryqtandyrý jelisi paıda bolatynyn jazǵanbyz.