Prezıdent tapsyrmasy: Aqtaýda teńiz akademııasynyń jańa ǵımaraty ashyldy
ASTANA. KAZINFORM - Yessenov University-de Teńiz akademııasynyń jańa oqý ǵımaratynyń saltanatty ashylý rásimi ótti, dep habarlaıdy QR Ǵylym jáne bilim mınıstrliginiń baspasóz qyzmeti.
Іs-sharaǵa Mańǵystaý oblysynyń ákimi Nurdáýlet Qılybaı, QR Ǵylym jáne joǵary bilim vıtse-mınıstri Talǵat Eshenqulov, memlekettik organdardyń ókilderi, ǵylymı qaýymdastyq músheleri, salalyq uıymdar, professor-oqytýshylar quramy, stýdentter jáne teńiz salasynyń ardagerleri qatysty.
QR Prezıdenti Qasym-Jomart Toqaev Ǵylym jáne tehnologııalar jónindegi ulttyq keńestiń alǵashqy otyrysynda:
-Óńirlerde akademııalyq basymdyq ortalyqtaryn, onyń ishinde tehnoparkterdi, ınjenerlik habtar men zerthanalardy qurý mindetin qoıamyn. Bul rette óńirlik erekshelikterdi, sondaı-aq ǵylymı-tehnologııalyq jáne ekonomıkalyq damýdyń basymdyqtaryn eskerý mańyzdy, – dep atap ótken bolatyn.
Memleket basshysynyń bul tapsyrmasy Yessenov University janyndaǵy Teńiz akademııasy bazasynda Qazaqstannyń teńiz salasyndaǵy jetekshi bilim berý jáne ǵylymı ortalyǵy retinde akademııalyq basymdyq ortalyǵyn qurý jobasynyń strategııalyq negizine aınaldy.
-Yessenov University Teńiz akademııasynyń jańa oqý ǵımaratynyń ashylýy – Qazaqstannyń teńiz salasyndaǵy kadrlyq jáne ǵylymı áleýetin nyǵaıtýdaǵy mańyzdy qadam. Halyqaralyq ozyq tehnologııalarmen jáne zamanaýı sımýlıatsııalyq júıelermen jabdyqtalǵan bilim berý ınfraqurylymy elimizde de, halyqaralyq deńgeıde de suranysqa ıe joǵary bilikti mamandar daıarlaýǵa múmkindik beredi. Osyndaı jobalardy júzege asyrý qoldanbaly ǵylymdy damytýǵa, tehnologııalar transfertin ilgeriletýge jáne otandyq joǵary bilimniń básekege qabilettiligin arttyrýǵa yqpal etedi, – dedi QR Ǵylym jáne joǵary bilim vıtse-mınıstri Talǵat Eshenqulov.
Teńiz salasyndaǵy akademııalyq basymdyq ortalyǵy jobasy Eýropa men Azııa arasyndaǵy halyqaralyq saýdanyń negizgi baǵyttarynyń birine aınalyp kele jatqan Transkaspıı halyqaralyq kólik baǵytyn damytý úshin strategııalyq mańyzǵa ıe. Akademııa Orta dálizdiń porttyq, keme qatynasy jáne logıstıkalyq ınfraqurylymy úshin kadrlar daıarlaýdy, qoldanbaly zertteýlerdi damytýdy, kólik úderisterin tsıfrlandyrýdy jáne teńiz salasyna ınnovatsııalyq sheshimderdi engizýdi qamtamasyz etedi.
Aqtaý qalasy – Qazaqstannyń strategııalyq teńiz qaqpasy. Óńirde 30-dan astam keme qatynasy kompanııasy jumys isteıdi jáne 2000-nan astam teńizshi eńbek etedi. Halyqaralyq deńgeıdegi jeke kadrlyq rezervti qalyptastyrý – eldiń teńiz ındýstrııasyn turaqty damytýdyń mańyzdy sharty.
Yessenov University-diń jeke qarajaty esebinen salynǵan, jalpy aýmaǵy 4600 sharshy metr bolatyn jańa úsh qabatty oqý ǵımaraty 900 bilim alýshyǵa arnalǵan.
Teńiz akademııasyn damytýdaǵy mańyzdy baǵyttardyń biri – ǵylymı-tehnologııalyq ınfraqurylymdy halyqaralyq deńgeıdegi zamanaýı teńiz sımýlıatorlarymen jabdyqtaý. QR Ǵylym jáne joǵary bilim mınıstrliginiń baǵdarlamalyq-nysanaly qarjylandyrýy aıasynda júzege asyrylyp jatqan «Kaspıı teńiziniń qazaqstandyq sektoryndaǵy teńiz operatsııalarynyń tıimdiligi men ekologııalyq turaqtylyǵyn arttyrýǵa arnalǵan keshendi energııa únemdeý tehnologııalaryn ázirleý» jobasy boıynsha Kongsberg kompanııasynyń zamanaýı navıgatsııalyq jáne ınjenerlik sımýlıatorlary satyp alyndy.
Qazirgi tańda Teńiz akademııasynda 350 stýdent bilim alady. Mamandar daıarlaý bakalavrıattyń 6 bilim berý baǵdarlamasy jáne magıstratýranyń 4 bilim berý baǵdarlamasy boıynsha júzege asyrylady. Atap aıtqanda, keme júrgizý, keme energetıkalyq qondyrǵylaryn paıdalaný, kemeniń elektr jabdyqtary men avtomatıka quraldaryn paıdalaný, porttar men kólik termınaldarynyń tıeý-túsirý jabdyqtaryn paıdalaný, teńiz tehnıkasy men tehnologııalary, sý kóligin basqarý, mashına jasaý, kólik logıstıkasy, kólik jáne kólik tehnıkasy baǵyttary qamtylǵan.
Jańa keshenniń ınfraqurylymyna áskerı kafedra stýdentterin daıarlaýǵa arnalǵan saptyq alań, qaraýyl qalashyǵy jáne zamanaýı kedergiler jolaǵy kiredi. Ashylý kúni 130-dan astam kýrsant áskerı ant qabyldady.
Teńiz akademııasy bazasynda akademııalyq basymdyq ortalyǵyn qurý jobasyn iske asyrý ýnıversıtettiń ǵylymı-bilim berý jáne óndiristik bazasyn nyǵaıtýǵa, bilim alýshylardyń praktıkalyq quzyretterin keńeıtýge, áskerı jáne teńiz biliminiń sapasyn arttyrýǵa, eldi bilikti kadrlarmen qamtamasyz etýge, ǵylymı zertteýlerdi kommertsııalandyrýdy damytýǵa jáne ýnıversıtet pen Mańǵystaý oblysynyń halyqaralyq deńgeıdegi tanymaldyǵyn arttyrýǵa múmkindik beredi.
