Prezıdent tapsyrmalaryn júzege asyrý: Elimizdiń óńirlerinde ınfraqurylym jańǵyrtylyp, áleýmettik sala damyp keledi
ASTANA. KAZINFORM- Memleket basshysy Qasym-Jomart Toqaevtyń tapsyrmalaryn oryndaý aıasynda elimizdiń óńirlerinde azamattardyń ómir súrý sapasyn jaqsartýǵa baǵyttalǵan júıeli jumystar jalǵasýda. Oblystarda jańa ınjenerlik jeliler paıdalanýǵa beriledi, áleýmettik nysandar ashylyp, zamanaýı týrıstik ınfraqurylym qurylyp jatyr.
Qosshy qalasyn gazben qamtamasyz etý
Aqmola oblysynyń Qosshy qalasynda gazben qamtamasyz etý jobasy tolyǵymen aıaqtalyp, paıdalanýǵa berildi. «Saryarqa» magıstraldy gaz qubyrynan tartylǵan jeliniń ekinshi jáne úshinshi iske qosý keshenderi resmı túrde iske qosyldy, nátıjesinde barlyq shaǵyn aýdan tabıǵı gazǵa qosylý múmkindigine ıe boldy. Joba aıasynda 400 shaqyrymnan astam gaz taratý jelileri salynyp, 1 blokty jáne 43 shkafty gaz retteý pýnkti ornatyldy, al 112 myńǵa jýyq turǵyn kógildir otynmen qamtamasyz etildi.
Poltavka aýylyn qamtý
Aqtóbe oblysynyń Poltavka aýylynda tabıǵı gaz iske qosyldy. Jobanyń quny – 581,4 mln teńge. Gazben qamtý aıasynda 6,4 shaqyrym gaz qubyry tartylyp, ınjenerlik ınfraqurylym tolyqtaı salyndy. Nátıjesinde 99 aýla men 316 turǵyn tabıǵa gazǵa qol jetkizdi. Osylaısha, óńirdi gazben qamtamasyz etý deńgeıi 97,5%-ǵa jetti.
Besaǵash aýylyn sýmen qamtamasyz etý
Almaty oblysynyń Besaǵash aýylynda tozý deńgeıi 95%-ǵa jetken 1975 jyly salynǵan sý qubyrynyń ornyna uzyndyǵy 32 shaqyrymnan asatyn jańa qubyr salyndy. Nátıjesinde 800-den astam abonent, ıaǵnı, 3,8 myńnan astam turǵyn ortalyqtandyrylǵan sý júıesine qosyldy. Sonymen qatar óńirde Tuzdybastaý aýylynda 127 shaqyrym sý qubyryn jańǵyrtý jáne qosymsha transformatorlar ornatý jobalary aıaqtalýda.
Belsendi uzaq ómir súrý ortalyǵy
Aqmola oblysynyń Derjavınsk qalasynda kúndelikti 30-ǵa jýyq adamdy qabyldaı alatyn Belsendi uzaq ómir súrý ortalyǵy ashyldy. Ortalyqta jattyǵý zaly, ıogaǵa arnalǵan aımaqtar, ústel oıyndary men qolóner sheberhanasy, sondaı-aq vokal stýdııasy jabdyqtalǵan. Nysan urpaqtar sabaqtastyǵyn nyǵaıtý maqsatynda balalar mýzyka mektebi jáne balalar shyǵarmashylyǵy ortalyǵymen bir ǵımaratta ornalasqan.
Pedagogterdi beıimdelgen sport negizderi boıynsha oqytý
Qaraǵandy oblysynda jyl sońyna deıin 500-ge jýyq dene shynyqtyrý pániniń muǵalimi erekshe bilim berý qajettilikteri bar balalarmen jumys isteýge arnalǵan beıimdelgen sport negizderi boıynsha oqýdan ótedi. Joba aıasynda óńirdegi árbir mektepte arnaıy daıarlanǵan maman bolady. Sonymen qatar atalǵan kýrs eki jergilikti kolledjdiń oqý baǵdarlamasyna engiziledi. Budan bólek, oblysta beıimdelgen sport sektsııalarynyń jelisi men ınklıýzıvti «Jasyl el» eńbek jasaqtaryna qatysýshylar sany keńeıtilýde.
«Saryarqa syry» vızıt-ortalyǵy
Pavlodar oblysynyń Baıanaýyl kýrorttyq aımaǵynda aýdany 740 sharshy metr bolatyn zamanaýı Vizit Bayanaul «Saryarqa syry» vızıt-ortalyǵy ashyldy. Nysan tsıfrlyq tehnologııalarmen jáne jasandy ıntellekt elementterimen jabdyqtalǵan. Joba óńirdiń týrıstik ınfraqurylymyn keshendi jańǵyrtý aıasynda júzege asyryldy. Onyń quramyna jańa kireberis stelasy men demalys aımaqtaryn abattandyrý jumystary da kiredi. Keshendi jańǵyrtý nátıjesinde bıyl óńirge keletin týrıster sany 300 myń adamǵa deıin artady dep kútilýde.
Aıta keteıik, osyǵan deıin Prezıdent Úkimetke áleýmettik jáne ınfraqurylymdyq nysandar salýdy jedeldetýdi tapsyrǵan bolatyn.
