Prezıdent tapsyrmalaryn júzege asyrý: «Báıterek» ekonomıkanyń naqty sektoryn qoldaýdy kúsheıtedi
ASTANA. KAZINFORM – Úkimette Premer-mınıstr Oljas Bektenovtiń tóraǵalyǵymen «Báıterek» ulttyq basqarýshy holdıngi» AQ dırektorlar keńesiniń otyrysy ótti. Bul týraly Úkimettiń baspasóz qyzmeti habarlady.
Onda Memleket basshysynyń ekonomıkanyń naqty sektoryn qoldaýdy keńeıtý jónindegi tapsyrmalaryn júzege asyrý barysyna nazar aýdaryldy.
Holdıngtiń málimetinshe, 2025 jyldyń jeti aıynda «Báıterek» kásipkerlerge 4 trln teńgeden astam somma kóleminde qoldaý kórsetken, bul 8 trln teńgeniń jyldyq josparynyń 50%-yn quraıdy. Onyń 1,95 trln teńgesi ShOB-ty damytýǵa, agroónerkásip keshenine bólingen 657,5 mlrd teńgeni qosa alǵanda, 1,64 trln teńgesi — aralas shaǵyn kásiporyndardy damytatyn iri bıznesti qoldaýǵa, 414 mlrd teńge eksporttaýshylarǵa bólindi.
Holdıng qyzmeti aıasynda 2025 jyldyń І toqsanynda satyp alý kólemi 6,8 mlrd teńgeni qurady, onyń 5,7 mlrd teńgesi (84%) otandyq taýar óndirýshilerdiń úlesine tıesili. Bul ulttyq jetkizýshilerge basymdyq berýge jáne ishki naryqtyń damýyn qoldaýǵa múmkindik berdi.
Sondaı-aq «Báıterek» holdıngi týrısterdi tartýdyń jańa ortalyǵyn qurýǵa múmkindik beretin álemdik deńgeıdegi Almaty Superski taý shańǵysy kýrortyn qurý jónindegi jobanyń operatory bolyp aıqyndaldy. Joba el ekonomıkasyn ártaraptandyrýǵa jáne Qazaqstannyń halyqaralyq týrıstik naryqtaǵy básekege qabilettiligin arttyrýǵa yqpal etedi.
Dırektorlar keńesi Holdıngtiń 2025-2028 jyldarǵa arnalǵan damý kórsetkishterin bekitti. Qujat kiristerdiń ósýin, ınvestıtsııalyq baǵdarlamalardy keńeıtýdi, sondaı-aq ekonomıkany ártaraptandyrýǵa jáne bıznes úshin qosymsha múmkindik týǵyzatyn jańa jobalarǵa, onyń ishinde týrızm men ınfraqurylymdy damytýǵa qatysýdy kózdeıdi.
Korporatıvtik basqarýdyń jańa standarttaryn engizý, satyp alý rásimderiniń ashyqtyǵyn arttyrý jáne sybaılas jemqorlyq táýekelderiniń aldyn alý sharalary Holdıngtiń ınstıtýtsıonaldyq turaqtylyǵyn nyǵaıtýǵa jáne kvazımemlekettik sektor júıesiniń tıimdiligin arttyrýǵa yqpal etedi.
Dırektorlar keńesi otyrysynyń qorytyndysy boıynsha:
● ındýstrııalandyrý, eksport jáne jańa tehnologııalar engizý salalaryndaǵy ınvestıtsııalyq jobalarǵa — $500 mln deıingi somaǵa eýrooblıgatsııalar shyǵarý;
● óńdeý ónerkásibin, metallýrgııany, kólik jáne energetıkalyq ınfraqurylymdy damytý, sondaı-aq «jasyl» tehnologııalar salasyndaǵy jobalarǵa — $500 mln deıingi somaǵa oblıgatsııalardy satyp alý jónindegi mámile;
● agroónerkásip keshenin damytý úshin — 100 mlrd teńgege oblıgatsııalar shyǵarý, onyń 50 mlrd-y otandyq taýar óndirýshilerdi jeńildikpen qarjylandyrýǵa jáne 50 mlrd-y Qazaqstanda óndirilgen aýyl sharýashylyǵy tehnıkasy parkin jańartýǵa jumsalady. Bul salany jańǵyrtýǵa, onyń tıimdiligin arttyrýǵa jáne elimizdiń azyq-túlik qaýipsizdigin qamtamasyz etýge jaǵdaı jasaıdy;
● ındýstrııalyq jáne ınfraqurylymdyq jobalardy qarjylandyrý úshin tartymdy mólsherlemeleri bar uzaqmerzimdi valıýtalyq qor jasaý jáne resýrstardy tartýǵa — 500 mln Qytaı ıýanine deıingi oblıgatsııalardy satyp alý boıynsha mámile.
Aıta ketelik Úkimette ishki qajettilikterdi qamtamasyz etý máseleleri qaralǵan edi.