Prezıdent tapsyrmalaryn iske asyrý jolynda naqty ister qajet – Senat tóraǵasy
ASTANA. KAZINFORM – Prezıdenttiń barlyq tapsyrmalaryn ýaqytyly ári sapaly oryndaý qajet. Bul týraly Senat tóraǵasy Máýlen Áshimbaev málim etti.
- Osy aptada Memleket basshysy Qasym-Jomart Kemeluly Toqaev Úkimettiń keńeıtilgen otyrysyn ótkizdi. Alqaly jıynda elimizdiń damý barysy keńinen talqylanyp, halyqtyń ál-aýqatyn arttyrýdy qamtamasyz etetin negizgi baǵyttar aıqyndaldy. Bul baǵyttar barlyq salany qamtyp otyr. Sondyqtan Prezıdentimiz belgilep bergen mindetterdiń oryndalýy Palatamyzdyń erekshe nazarynda bolady. Ásirese, zańnamalyq ózgeristerge qatysty tapsyrmalar aıasynda naqty jumys isteýimiz kerek. Memleket basshysy bergen tapsyrmalar qatarynda salyq-bıýdjet saıasatyn reformalaýdy kózdeıtin jańa Bıýdjet jáne Salyq kodeksteri bar. Tıisti zańdardy ýaqtyly qaraıtyn bolamyz. Sondaı-aq, Parlamentke sessııa sońyna deıin geologııalyq barlaý jumysynyń tıimdiligin arttyratyn zańnamalyq túzetýler qabyldaý mindeti júkteldi. Sonymen qatar, tsıfrlyq aktıvterdiń qoldaný aıasyn keńeıtýge arnalǵan ınfraqurylymdy qurý da mańyzdy mindet retinde belgilendi. Elimizdegi energetıkany damytý jáne ıadrolyq klaster qurý isiniń mańyzdy ekeni de aıtyldy. Bul da zańnamalyq qoldaýdy talap etetin baǵyt, - dedi M. Áshimbaev Senattyń jalpy otyrysynda.
Sonymen qatar Senat tóraǵasy mindetti áleýmettik medıtsınalyq saqtandyrý júıesin jetildirý týraly zań jobasyn osy sessııanyń sońyna deıin pysyqtaý kerek ekenin aıtty.
- Atalǵan jáne basqa da tapsyrmalardy iske asyrý jolynda batyl sheshimder men naqty ister qajet. Sondyqtan Úkimet otyrysynda aıtylǵan máselelerdi jumys barysynda basshylyqqa alyp, tıisti zańdardy qabyldaıtyn bolamyz. Aldaǵy ýaqytta Prezıdentimizdiń barlyq tapsyrmalaryn ýaqytyly ári sapaly oryndaý jolynda Úkimetpen jáne Májilispen birlesip, nátıjeli jumys isteımiz dep senemin, - dedi M. Áshimbaev.
Eske salsaq, 28 qańtarda Prezıdent Qasym-Jomart Toqaevtyń qatysýymen Úkimettiń keńeıtilgen otyrysy ótti.