Prezıdent tapsyrmalaryn oryndaý: Kósherbaev Qapshaǵaıdyń týrıstik ınfraqurylymymen tanysty

QONAEV. KAZINFORM – Prezıdenttiń tapsyrmasy boıynsha Úkimet eldiń týrıstik aımaqtaryn tıisti jaǵdaıǵa keltirý jóninde shuǵyl sharalar qabyldap jatyr. Memleket basshysy tanymal demalys oryndarynda servıs sapasynyń tómendigine, ınfraqurylymdardyń daıyndyǵynyń nasharlyǵyna jáne sanıtarlyq problemalarǵa jol bermeýdi erekshe atap ótti.

Premer-mınıstr Oljas Bektenovtiń tapsyrmasyn oryndaý úshin Premer-mınıstrdiń orynbasary Ermek Kósherbaev týrıstik basym baǵyttardyń jaı-kúıin baǵalaý úshin óńirlerge jumys saparlaryn bastady. Birinshi nysan Qonaev qalasyndaǵy Qapshaǵaı sý qoımasynyń jaǵalaýy boldy.

Qapshaǵaı sý qoımasy — ishki týrızmniń eń kóp adam jınalatyn baǵyttarynyń biri. 2025 jyldyń birinshi jartyjyldyǵynda onyń jaǵalaýyna 860 myńnan astam adam keldi. Óńirde 140 týrıstik nysan, onyń ishinde 8 kommýnaldyq jaǵajaı bar.

Sapar barysynda Ermek Kósherbaev qonaqtardy ornalastyrý obektileriniń, jaǵajaı jáne jol ınfraqurylymynyń jaı-kúıimen, aýmaqty sanıtarlyq kútip ustaýmen, qoǵamdyq tártipti qamtamasyz etý jáne shuǵyl qyzmetterdiń daıyndyǵymen tanysty. Vıtse-premer aımaq ákimdigine bıylǵy kúzge deıin soltústik jaǵajaıǵa baratyn joldyń jumystaryn aıaqtaýdy tapsyrdy.

Bıznes ókilderi men óńir turǵyndary týrıstik aımaqtyń problemalyq máselelerin aıtty. Infraqurylymdyq shekteýlerge erekshe nazar aýdaryldy. Máselen, kásipkerler qosalqy elektr stansalarynyń jetispeýshiligin, ortalyqtandyrylǵan káriz júıesiniń joqtyǵyn jáne ınjenerlik jelilerdiń shamadan tys júktememen jumys istep turǵanyn atap ótti. Qanshama ınvestıtsııa salynyp jatqanyna qaramastan, jergilikti atqarýshy organdar tarapynan júıeli sheshim bolmasa týrıstik aımaqtyń turaqty damýy múmkin emes. Máselen, jaǵajaılarda 280 dárethana bar, olardyń sanıtarlyq-gıgıenalyq qyzmeti únemi baqylaýdy jáne naqty úılestirýdi qajet etedi.

Basymdyqtardyń qatarynda qaýipsizdikti qamtamasyz etý jáne tótenshe jaǵdaılarǵa daıyndyq qarastyrylyp otyr. Premer-mınıstrdiń orynbasary Tótenshe jaǵdaılar mınıstrligine jaǵajaılardaǵy barlyq qutqarý kabınalaryn talaptarǵa saı etýdi jáne profılaktıkalyq jumystardy kúsheıtýdi tapsyrdy. Sondaı-aq jumys sapary aıasynda ınjenerlik júıeler men sanıtarlyq-epıdemıologııalyq qyzmetterdiń demalýshylardyń jappaı aǵynyna daıyndyǵy, ásirese 15 myń adamǵa deıin qatysatyn is-sharalardy ótkizý máseleleri talqylandy.

Sapar barysynda týrıstik aýmaqtardy aımaqtarǵa bólý boıynsha pılottyq joba usynyldy. Aýyl sharýashylyǵy mınıstrligi ókilderiniń aıtýynsha, mundaı júıe jaǵalaýdy fýnktsıonaldy aımaqtarǵa, ıaǵnı rekreatsııalyq, tabıǵatty qorǵaý, ınfraqurylymdyq jáne ózge de ýchaskelerge bólýdi qarastyrady. Bul aýmaqtyń damýyn tıimdirek basqarýǵa, ekologııalyq tepe-teńdikti saqtaýǵa jáne demalýshylar men ınvestorlar úshin jaılylyqty qamtamasyz etýge múmkindik beredi.

Sonymen qatar baǵa taqyryby da kóterildi. Barlyq jaǵdaı jasalyp jatqanyna qaramastan, birqatar nysandardaǵy qyzmetterdiń quny joǵary bolyp otyr. Sol sebepti baǵanyń ósý sebepterine, ásirese kommýnaldyq jaǵajaılardyń baǵasyna taldaý júrgizý tapsyryldy, ol jerlerdegi qyzmetter halyq úshin barynsha qoljetimdi bolýy tıis.

Ekologııalyq máseleler de sóz boldy. Máselen, Balqash kólindegi sýdyń deńgeıi turaqty bolsa, Alakólde ol jaǵalaýdan alystap nemese jaqyndap jıi ózgeredi. Bul jaǵalaý syzyǵynyń aýytqýyna jáne ınfraqurylymdardyń oryn almastyrýǵa májbúr etedi. Ermek Kósherbaev jańa obektilerdi salý kezinde tabıǵı faktorlardy esepke alyp, ǵylymı jáne ınjenerlik súıemeldeý qajettigin atap ótti.

– Kommýnaldyq jaǵajaılar tazalyq pen qyzmet kórsetý sapasy boıynsha standarttardy ustanýy kerek. Jaıma bazar, «kóleńkede» jumys isteýge jol berýge bolmaıdy. Túbirtekter, termınaldar, salyqtyq tirkeý bolýy kerek. Adamdardy bala kezinen bastap tártip pen zańǵa úıretý qajet. Bılik tarapynan aǵymdaǵy máselelerdi joıý ǵana emes, júıeli túrde tártip ornatý jáne azamattardyń kútkenine saı jaǵdaı jasaý mańyzdy. Týrızm – bul eldiń bet-beınesi. Alakól, Qapshaǵaı, Balqash sııaqty tabıǵı aımaqtardy salý kezinde jaǵalaý syzyǵynyń ózgergishtigin eskerý, kúzet aımaqtaryn salý, halyqpen túsindirý jumystaryn júrgizý qajet. Munyń barlyǵyna jergilikti atqarýshy organdar jaýapty, - dep atap ótti vıtse-premer. 

Jumys sapary jalǵasyp jatyr. Barlyq týrıstik nysandy aralaý aıaqtalǵannan keıin óńir ákimderiniń jáne ýákiletti memlekettik organ basshylarynyń qatysýymen keńeıtilgen jıyn ótedi. Onda anyqtalǵan kemshilikterdi joıý barysyna baǵa beriledi jáne odan arǵy sharalar aıqyndalady.

Eske sala keteıik, buǵan deıin Premer-mınıstr Oljas Bektenov Prezıdent Qasym-Jomart Toqaevtyń týrıstik saladaǵy tapsyrmalarynyń oryndalý barysy týraly jıyn ótkizgenin jazǵan edik.