Prezıdent tamyzdaǵy apat kezinde-aq «ArselorMıttal Temirtaýdyń» máselesin maıshammen qaraýdy tapsyrǵan
Prezıdent Qasym-Jomart Toqaev «ArselorMıttal Temirtaýǵa» qarasty «Qazaqstan» shahtasyndaǵy apat kezinde-aq ınvestordyń máselesin maıshammen qaraýdy tapsyrǵan bolatyn. Búgingi Kostenko atyndaǵy shahtada bolǵan qaıǵyly oqıǵa sol tapsyrmanyń sylbyr oryndalǵanyn kórsetip otyr, dep habarlaıdy Kazinform.
Memleket basshysy 18 tamyzda «Qazaqstan» shahtasynda bolǵan órtke baılanysty Úkimetke jáne Qaraǵandy oblysynyń ákimdigine apat sebepterine jan-jaqty tergeý júrgizý, sondaı-aq zardap shekkenderge qajet barlyq kómekti kórsetý jóninde tapsyrma bergen bolatyn.
Naqty aıtsaq, Úkimetke osy kásiporynǵa ıelik etetin sheteldik kompanııamen jumysshylardyń qaýipsizdigin múltiksiz qamtamasyz etý jóninde kelissózder júrgizýdi tapsyrǵan.
«Sheteldik kompanııaǵa tıesili kásiporyndarda jıi qaıtalanatyn apattar olardyń ınvestıtsııalyq jáne ózge de mindettemelerin óreskel buzǵanyn kórsetedi. Atalǵan jaǵdaılar olardyń Qazaqstan naryǵynda qyzmet etýine qatysty sheshim shyǵarýǵa yqpal etedi», - dep jazǵan edi Aqorda.
Budan keıin eńbek qaýipsizdigi men ekologııalyq qaýipsizdikti saqtamaǵany úshin Ýkraınada da basy daýǵa qalǵan Lakshmı Mıttalǵa tıesili «ArselorMıttal Temirtaý» kásipornyna jańa ınvestor keletini týraly áńgime jeldeı esken. Osyndaı qyzý pikirtalastyń arasynda qoǵam tarapynan ondaı ınvestordyń Reseıden keletini týraly málimetterge qarsylyǵy da baıqaldy.
Osydan keıin Premer-Mınıstrdiń birinshi orynbasary Roman Sklıar «ArselorMıttal Temirtaý» kompanııasynyń ornyna reseılik «Severstal» kompanııasynyń keletini týraly málimetti joqqa shyǵarǵan edi.
«Olaı emes, Reseı kompanııalarynan eshkim kelissóz júrgizip jatqan joq. Taǵy da túsindirip aıtaıyn, eshqandaı kelissóz júrip jatqan joq», - degen birinshi vıtse-premer.
Sondaı-aq ol ázirge ınvestor qaı elden keletinin aıtý erte ekenin málim etken.
«Iá, shynymen de, kompanııa qondyrǵylardy jóndeý, ınvestıtsııalar boıynsha mindettemelerin keshiktirýde. Kásiporynda adam qazasymen baılanysty qaıǵyly oqıǵalar bolyp jatyr. Onyń bári bizdi alańdatpaı qoımaıdy. Sondyqtan óndiristi damytýǵa aqsha quıyp, tıimdi jumys isteı alatyn ózge ınvestorlardy tartý baǵytynda jumys júrgizilip jatyr. Onyń ishinde eńbek qaýipsizdigi – negizgi basym baǵyt. Qazir qaı eldiń ınvestorlary kelýi múmkin ekenin aıta almaımyn, erte bolady», - dedi birinshi vıtse-premer.
Keıin Úkimettegi baspasóz máslıhatynda Ónerkásip jáne qurylys mınıstri Qanat Sharlapaev «ArselorMıttal Temirtaýdyń» ornyna basqa ınvestor ákelý qanshalyqty múmkin ekeni týraly suraqqa jaýap bergen bolatyn.
«Investordy aýystyrý – bul bir ınvestordyń óz ornyna basqa ınvestordy ákelý erki. Bireý ketip, óz úlesin basqa bir tulǵaǵa berý kerek. Bul jaǵdaıda ágime mynandaı. Memleket jumys istep jatqan tosyn jaıttar jeterlik. Osy jumystar bitken kezde kásiporynǵa sol jumystardyń qorytyndysynyń áseri bolady dep oılaımyn. Jaýapkershilik turǵysynda elimizde kóp dúnıe jasalyp jatyr dep oılaımyn. Adamdar qazasyna baılanysty qylmystyq ister qozǵaldy, quzyrly organdar tergep, tekserip jatyr. Buryn bolǵan dúnıe týraly pikir bildire almaımyn. Jaqynda adam qazasy tirkelgen tosyn oqıǵa boıynsha qozǵalǵan is qazir tergeý satysynda tur. Tergeý barysyna pikir bildirmeımin», - dedi ol.
Eske salsaq, búgin tańerteń Qaraǵandy oblysyndaǵy Kostenko atyndaǵy shahtada órt shyqqan bolatyn. Tótenshe jaǵdaı týraly sońǵy málimetti myna jerden bile alasyz.
Aıta ketý kerek, qoǵamda atalǵan mınıstrdiń de Lakshmı Mıttal sııaqty Ulybrıtanııa azamaty bolǵany týraly málimet qyzý talqylanyp júr. Úkimettegi baspasóz konferentsııalarda Qanat Sharlapaevqa osyndaı suraq talaı ret qoıyldy da. Ondaı suraqtyń bárine mınıstr «Men otanyma oralǵan qandaspyn» dep jaýap beredi.
«Men qazir ózim qazaq tilin meńgerip jatyrmyn. Aptasyna 5 ret sabaq alam, muǵalim keledi, sonymen qazaqsha sabaq oqımyn. Eń aldymen, men eshqandaı bóten, ózge adam emespin. Men Qazaqstanǵa qaıtyp kelgen qandaspyn», - deıdi Qanat Sharlapaev.
