Prezıdent tabysqa jetken árbir kásipkerdi aýyl-aımaǵynyń órkendeýine úles qosýǵa shaqyrdy

ASTANA. KAZINFORM — Bul týraly Memleket basshysy Qasym-Jomart Toqaev Aýyl sharýashylyǵy eńbekkerleriniń ekinshi forýmynda aıtty.   

— Taǵy da qaıtalap aıtqym keledi aýyl sharýashylyǵy damysa, eń aldymen aýyldyń jaǵdaıy jaqsarady. Memleket aýyl-aımaqtardy kórkeıtý úshin kóptegen jobalardy qolǵa aldy. Infraqurylym salýdan bastap, aýylǵa bilikti maman tartý máselesine deıin aýqymdy jumys júrgizilip jatyr.

2019 jyldan beri «Aýyl — el besigi» jobasy júzege asyrylyp jatyr. Osy joba aıasynda aýyl ınfraqurylymyn damytýǵa 700 mıllıard teńgeden astam qarjy bólindi. Búkil el boıynsha 2,5 myńnan asa eldi mekende naqty jumys atqaryldy, — dedi Prezıdent.

«Aýyl amanaty» baǵdarlamasy aıasynda 600-den astam birlestik quryldy.

— Úkimet bıyl aımaqtardy damytý týraly arnaıy tujyrymdama qabyldady. Soǵan sáıkes aýdan ákimderiniń quzyry keńeıdi. Endi olar aýdandy damytý josparyn óz deńgeıinde, derbes ázirlep, júzege asyra alady.

Ákimder iri kompanııalarmen kelisim jasap, birlesken sharýashylyqtardyń (kooperatıvterdiń) ónimin ótkizýge kómektesýi qajet. Jalpy, aýylǵa jeke ınvestıtsııa tartý óte mańyzdy. Bul jumysqa bıznes ókilderi belsene atsalysýy kerek. Tabysqa jetken árbir kásipker óz aýyl-aımaǵynyń órkendeýine úles qosyp, qarjy salsa, elimizdegi kóptegen eldi meken kórkeıe túseri anyq.

Eńbekqor, maqsaty aıqyn azamattarymyz kúndelikti mańdaı terimen ulttyq baılyǵymyzdy eselep, el kelesheginiń jarqyn bolýyna aıanbaı úles qosýda. Mundaı ispen aınalysyp jatqan adamdarǵa qolaıly jaǵdaı jasap, elimizdiń shynaıy patrıottaryn yntalandyryp otyrý kerek. Biz bul sharýany nazardan tys qaldyrmaımyz, — dedi ol.

Aıta ketelik Toqaev agroónerkásip keshenindegi aqparattyq júıelerdi ıntegratsııalaýdy tapsyrdy.