Prezıdent tabıǵı apatpen kúresip júrgen azamattarǵa alǵys aıtty
PETROPAVL. KAZINFORM - Memleket basshysy Soltústik Qazaqstan oblysyna jasaǵan jumys sapary aıasynda sý tasqynynan zardap shekken turǵyndarǵa kómektesip jatqan qutqarýshylarmen, eriktilermen jáne kásipkerlermen kezdesti, dep habarlaıdy Aqordanyń baspasóz qyzmeti.
Qasym-Jomart Toqaev tótenshe jaǵdaı kezinde óńir turǵyndarynyń joǵary deńgeıde uıymshyldyq tanytqanyn atap ótip, tabıǵat apatymen kúresip júrgen barlyq azamatqa alǵys aıtty.
Soltústik Qazaqstan oblysy boıynsha Qazaqstan halqy Assambleıasy tóraǵasynyń qoǵamdyq orynbasary Elena Semıdotskıh Prezıdentke oblystaǵy ár aýdanda gýmanıtarlyq kómek qabyldaıtyn pýnktter ashylǵany jóninde málimet berdi.
«Birgemiz» volonterler front-ofısiniń jetekshisi Anastasııa Volkova eriktilerdiń jedel áreket etý shtaby qurylǵany týraly aıtty. Shtab 2500-den astam volonterdi úıretedi jáne olardyń jumysyn úılestiredi.
«Sevkazenergo» aktsıonerlik qoǵamynyń bas dırektory Anatolıı Kazanovskıı atalǵan kásiporynnyń aktsıonerleri 100 mıllıon teńge bólgenin, transformatorlar ornatý jáne elektr jelilerin tartý jumystaryn júrgizgenin aıtty.
«Qyzyljar joldary» JShS dırektory Ashat Joldaspaev kompanııanyń sý tasqynyna qarsy sharalarǵa belsendi atsalysyp jatqanyn jetkizdi. Osy rette atalǵan mekeme bógetter salý jáne nyǵaıtý úshin arnaýly tehnıkalar men qajetti qural-jabdyqtar bólip otyr.
Buǵan deıin habarlaǵanymyzdaı, Memleket basshysy Soltústik Qazaqstan oblysyna jumys saparymen bardy. Qasym-Jomart Toqaevtyń jumys sapary Sergeevka sý qoımasyn, Qyzyljar aýdanyn jáne Petropavl qalasynyń tóńiregin tikushaqpen aralap kórýden bastaldy. Sondaı-aq Prezıdent Petropavl sý torabyda boldy.
