Prezıdent Syrty ister mınıstrligine: Ulttyq múddeni qorǵaıtyn kezde tıimdi jumys atqarylmaıdy
NUR-SULTAN. QazAqparat – Memlekettik apparat ishindegi baılanys, ózara yqpaldastyq álsiz. Bul týraly QR Syrtqy ister mınıstrliginiń keńeıtilgen alqa májilisinde QR Prezıdenti Qasym-Jomart Toqaev málim etti, dep habarlaıdy QazAqparat tilshisi.
Syrtqy saıasatty «Halyq únine qulaq asatyn memleket» tujyrymdamasyna saı júrgizip, onyń tıimdiligin barynsha arttyrý taqyrybyna toqtalǵan Prezıdent: «Qazir Qazaqstannyń syrtqa baǵyttalǵan jumysynda birtutas, jalpy memlekettik strategııa joq deýge bolady. Bul – júıeli sıpattaǵy másele. Syrtqy ister mınıstri Úkimette erekshe mártebege ıe bolyp, Premer-mınıstrdiń orynbasary deńgeıine kóterildi. Osyǵan oraı, Syrtqy ister mınıstrligi tyǵyz mekemearalyq úılestirý jumysyn tıimdi atqarýy kerek», - dedi Memleket basshysy.
Qasym-Jomart Toqaevtyń aıtýynsha, memlekettik apparat ishindegi baılanys, ózara yqpaldastyq álsiz. Jekelegen mekemelerdiń múddesine basymdyq berilip jatady. Bul – birazdan beri jalǵasyp kele jatqan teris úrdis.
«Sonyń kesirinen eleýli kemshilikter bolyp jatady. Oǵan qosa, ulttyq múddeni qorǵaıtyn kezde tıimdi jumys atqarylmaıdy. Mysaly, qazir Jaıyq ózeni tartylyp barady. Qazaqstanǵa joldanǵan júk Qytaı shekarasynda turyp qaldy. Bizdiń kásipkerlerimizdiń kórshi elder naryǵyndaǵy múddesi oıdaǵydaı qorǵalmaı otyr. Osyndaı keleńsizdikter halyqtyń turmys sapasyna jáne kóńil kúıine keri áser etedi», - dedi Prezıdent.
