Prezıdent sybaılas jemqorlyqqa qarsy kúrestegi qatań talaptar týraly aıtty
«Sybaılas jemqorlyqqa qarsy kúres – elimizdiń strategııalyq damýyndaǵy negizgi basymdyqtardyń biri. Bul – meniń berik ustanymym jáne saılaýaldy baǵdarlamada halyqqa bergen ýádem. Osy jumysta eshqandaı kózboıaýshylyqqa, «barmaq basty, kóz qysty» áreketterge jol berilmeýge tıis. Talap qatań bolady. Byltyrǵy jıynda biz naqty is-qımyl josparyn aıqyndadyq. Búginde birqatar maqsatty júzege asyrdyq», - dedi Memleket basshysy.
Osy oraıda Prezıdent Qazaqstan bedeldi halyqaralyq GREKO uıymyna, ıaǵnı sybaılas jemqorlyqqa qarsy memleketter tobyna múshe bolǵanyn eske saldy.
«Normatıvtik aktilerdi sybaılas jemqorlyqqa qarsy saraptamadan ótkizý ınstıtýtynyń jumysy jańǵyrdy. Qol astyndaǵylardyń jemqorlyq áreketteri úshin basshylaryn qyzmetinen bosatý qaǵıdaty engizildi. Memleketimizdiń osy baǵytta qolǵa alǵan sharalaryn belgili halyqaralyq agenttikter atap ótýde. Degenmen, biz buǵan toqmeıilsip otyra bermeýimiz kerek. Sybaılas jemqorlyq jaǵdaılarynyń sany áli de azaımaı tur. Ótken jylmen salystyrǵanda jemqorlyq áreketteri úshin jaýapqa tartylǵan adamdardyń sany 11 paıyzǵa artqan. Ashyǵyn aıtqanda, qazir kúndelikti jańalyqtardan túrli deńgeıdegi sheneýnikterdiń sybaılas jemqorlyqqa baılanysty zań buzýshylyqtary úshin ustalyp jatqany týraly oqıtyn boldyq», - dedi Qasym-Jomart Toqaev.