Prezıdent sybaılas jemqorlyqqa qarsy bastamasy joq passıv basshylar týraly aqparat talap etti

NUR-SULTAN. QazAqparat - Memlekettik organdardyń qyzmetine jónsiz aralasýdy doǵarǵan jón. Bul týraly sybaılas jemqorlyqqa qarsy kúres máseleleri jónindegi keńeste sóz sóılegen QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Sonymen qatar, memlekettik organdardyń qyzmetine jónsiz aralasýdy doǵarǵan jón. Sybaılas jemqorlyq pen basqarý isindegi olqylyqtardyń ara jigin naqty ajyrata bilý qajet. Qylmystyq protsess orbıtasyna adal, ózine jaýapkershilik alýdan qoryqpaıtyn sheneýnikter tartylmaýy tıis. Memlekettik apparat sheshim qabyldaýdan qoryqpaýy tıis», - dedi Memleket basshysy keńes barysynda.

QR Prezıdentiniń atap ótýinshe, búginde memlekettik qyzmetshilerdiń bastama kótermeıtindigi, jaýapkershilikten jaltarýy, basy artyq áýre-sarsańǵa salýshylyǵy syndy tendentsııa baıqalyp otyr. Mundaı jaǵdaı, ásirese, koronavırýs indeti kezinde anyq baıqaldy.

«Jemqorlyqpen belsendi kúres naýqanshyldyqqa jáne zulymdardy ustaýǵa aınalyp ketpeýi tıis. Jaýapty ári zańǵa moıynsunatyn memlekettik qyzmetshilerdiń jumys sapasyna qalaı bolǵanda da áserin tıgizbeýi qajet. Meniń tapsyrmammen qazirgi ýaqytta sybaılastarynyń kórsetýimen ǵana sottaý múmkindigi joıylyp, qylmysqa arandatqany úshin qylmystyq jaýapkershilik engiziledi. Bul normalar quqyq qorǵaý organdary tarapynan júgensizdiktiń jolyn kesýge múmkindik beredi»,- dedi Qasym-Jomart Toqaev.

Osy rette Memleket basshysy elimizdiń Bas prokýratýrasy men Sybaılas jemqorlyqqa qarsy qyzmetine jartyjyldyq esep-qısapta laıyqty sybaılas jemqorlyqqa qarsy bastamasy joq passıv basshylar týraly aqparat berýin tapsyrdy.

«Bul jergilikti atqarýshy organdarǵa da qatysty», - dep naqtylady Qazaqstan Prezıdenti.