Prezıdent sýmen qamtamasyz etý jobalaryn josparlaý kezinde N. Qapparovqa «tábetterin basý» kerektigin aıtty
ASTANA. QazAqparat - Búgin elordany odan ári damytý jónindegi keńeste Prezıdent Nursultan Nazarbaev QR Qorshaǵan orta jáne sý resýrstary mınıstrligi sýmen qamtamasyz etý jobalary boıynsha tábetin basýy kerektigin qadap aıtty.
Memleket basshysynyń sózine qaraǵanda, Astanaǵa sý tartý boıynsha eki usynys bolǵan. Onyń biri Sátbaev kanalynan 90 mlrd. teńgege qubyrdyń qurylysyn qarastyrsa, al ekinshisinde Sý resýrstary komıteti 5,8 mlrd. teńgege qoldanystaǵy júıeni qaıta jańǵyrtýdy usyndy.
«Men Ekologııa mınıstrligi men ákimdikke osy máseleni sheshýge tapsyrǵan bolatynmyn. Endi úshinshi nusqaǵa qaraǵanda 370 mlrd. teńge qajet eken. Bundaı mınıstrlermen memleket taqyrǵa otyrýy múmkin. Tábetterińdi basyp, nysandardy tıimdi paıdalanýdy qamtamasyz etińizder», - dep túıdi Prezıdent.
