Prezıdent suhbaty shaǵyn joldaýǵa uqsaıdy — saıasattanýshy
ASTANA. KAZINFORM — Saıasattanýshy Danııar Áshimbaev Memleket basshysy Qasym-Jomart Toqaevtyń «Turkistan» gazetine bergen suhbatyna oraı pikir bildirdi
— Prezıdenttiń dástúrge aınalǵan qańtardaǵy suhbaty (úshinshi ret) shaǵyn joldaýǵa uqsaıdy. Toqaev ótken jyldyń jetistikteri týraly aıtyp, bolashaqqa jospar qoıady jáne sonymen qatar synǵa jaýap beredi. Suraq-jaýap formaty Memleket basshysynyń tulǵasyn birshama keńirek tanýǵa múmkindik beredi. Jan-jaqty alyp qaraǵanda, Toqaev prezıdenttikti barynsha aýyr jumys retinde qabyldaıdy. Biraq ol bul mindetti óziniń memlekettik kózqarasy men eldiń negizgi máselelerin, ekonomıkasyn, mentalıtetin jáne basqarý júıesin tereń túsinýi arqyly tabysty atqaryp keledi. Prezıdent óz atyna aıtylǵan syndy kásibı emes ári biliksiz dep esepteıdi. Ol halyq pen bıznes-elıta joǵary murattarǵa saı bolýy úshin olardyń mentalıteti men ádep normalaryn túbegeıli jańartýǵa nıetti. Toqaev reformator kóshbasshynyń qoǵam tarapynan túsinbeýshilik pen qabyldamaý syndy baǵytyna qarsy turýdaǵy asa mańyzdy rólin atap ótti, — dep jazady saıasattanýshy Telegram-paraqshasynda.
Onyń atap ótýinshe, Prezıdent suhbatynyń edáýir bóligin salyq reformasynyń jáne «Tarıfti ınvestıtsııaǵa aıyrbastaý» baǵdarlamasynyń mańyzyna arnady. Memleket basshysynyń paıymynsha, jańa Salyq kodeksi, birinshi kezekte, qazirgi zamanǵy qoǵamdyq kelisimshart sanalady. Onda salyqtar aýyrtpalyq retinde qabyldanbaýy tıis. Ekinshiden, bul — turaqty ekonomıkalyq ósimge qol jetkizý quraly. Bul rette sóz logıstıka, aýyl sharýashylyǵy, týrızm, tsıfrlandyrý, atom energetıkasy jáne Prezıdent joǵary baǵalaıtyn jasandy ıntellektti damytý týraly bolyp otyr.
— Tarıftik saıasat týraly aıar bolsaq, onda Toqaev energetıkalyq jáne kommýnaldyq sektorlardyń ınvestıtsııalyq tartymdylyǵyn jaqsartýdyń túbegeıli mańyzdylyǵy týraly pikirdi qoldaıdy. Onyń aıtýynsha, tómen tarıfterden, arzan energııadan jáne janar-jaǵarmaıdan halyq emes, olıgarhtar, iri bıznes pen deldaldar paıda kóredi. Sonymen qatar, «elimiz lajsyzdan kórshi elderge arzan janar-jaǵarmaıdyń kóleńkeli jetkizýshisine aınalyp, olardyń ekonomıkalaryn qoldap otyr». Sondyqtan tarıfterdiń kóterilýi — bul durys, adal ekonomıkaǵa qaraı azapty qadam, — dedi Danııar Áshimbaev.
Saıasattanýshynyń aıtýynsha, Prezıdent qańtar oqıǵasy taqyrybyna toqtalyp, «Tóńkeris» jasaýǵa ábden mashyqtanǵan mamandardyń jetekshiligimen tártipsizdikti uıymdastyrýshylar Úkimettiń janar-jaǵarmaı baǵasyn ósirý týraly sheshimin jeleý etkenine, adamdardy jappaı sherýge shyǵýǵa ıtermelegine nazar aýdartady.
— Bul joly Prezıdent syrtqy saıasat máselelerine kóp kóńil bólmegenimen eldiń qorǵanys qabiletine qatysty máselege ýaqyt arnady. Toqaev armııaǵa baǵyttalǵan synǵa qarsy qatań pikir bildirip, «tanymaldyqqa umtylǵan keıbir blogerler áskerdegi shynaıy ahýalǵa múldem janaspaıtyn sóz taratyp júrgenin» aıtty. Memleket basshysy Pýtın men Nazarbaev áńgimelesýi barysynda ne aıtylǵany qyzyqtyrmaıtyndyǵyn túsindirdi. Toqaevtyń aıtýynsha, bılik tranzıti týraly aıtýǵa áli erte. Biraq, osy jyl «taǵdyrsheshti» bolady. Sóz osy jyldyń sońyna qaraı ótýi ytımal konstıtýtsııalyq reforma jónindegi referendým jaıynda bolyp otyr. Kóshbasshynyń róli men jaýapkershiligi týraly sóz bastaǵan Prezıdent ony shynaı patrıotızm týraly saýalmen aıaqtady. Onyń paıymynsha, «Otanshyl bolý — týǵan elińniń, otbasyńnyń ıgiligi úshin aıanbaı eńbek etý», — dedi Danııar Áshimbaev.
Aıta keteıik, búgin «Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.