Prezıdent suhbaty Qazaqstan damýynyń jańa kezeńine arnalady – Sarapshy
Qazaqstandaǵy ádilet júıesindegi reformalar – saıası reformalardyń negizi. Bul pikirdi QR Prezıdenti janyndaǵy Qazaqstan Strategııalyq zertteýler ınstıtýtynyń Strategııalyq taldaý bóliminiń bas sarapshysy Aıdana Akesına aıtty, dep habarlaıdy Kazinform.
«Jańa jyldyń alǵashqy kúnderi, qańtar oqıǵasynyń eki jyldyǵy qarsańynda Prezıdent Qasym-Jomart Toqaev elimizde júrgizilip jatqan saıası reformalar týraly óz oıymen bólisti. Prezıdent reforma saıasatynyń mańyzdy nátıjeleriniń biri retinde Konstıtýtsııalyq sotty qaıta qurýdyń mańyzdylyǵyn atap ótti. Suhbat ashyqtyq pen ádilettilikke umtylý basty maqsatqa aınalǵan Qazaqstan damýynyń jańa kezeńine arnalady», - deıdi sarapshy.
Konstıtýtsııalyq sot 2023 jyldyń 1 qańtarynan bastap jańa formatta jumys isteı bastady. Buryn bul ınstıtýt 1993-1995 jyldary bolǵan edi. Búgingi kúni ol elimizdiń quqyqtyq júıesiniń quramdas bóligine aınaldy.
«Qurylǵan kúnnen bastap jarty jylda 18 isti qaraǵan bul organnyń mańyzdylyǵyna Prezıdent basa nazar aýdardy. Reformalardyń mańyzdy aspektisi – azamattardyń belsendi qatysýy boldy. Konstıtýtsııalyq sotqa túsken 4 myńnan astam ótinish halyqtyń sot tóreligine jáne zańdylyqty qurmetteýge joǵary suranysyn kórsetedi. Astana, Almaty qalalary men Qostanaı oblysy sııaqty óńirler joǵary azamattyq belsendilik tanytyp, elimizdiń quqyqtyq júıesi men quqyqtyq mádenıetin qalyptastyrýǵa úles qosty», - dedi A.Akesına.
Konstıtýtsııalyq sottyń qurylýy bıliktiń bólinýin jáne konstıtýtsııalyq prıntsıpterdiń saqtalýyn baqylaýǵa umtylýǵa erekshe mán beredi. Konstıtýtsııalyq sot sheshimderiniń túpkilikti kúshi bar. Bul onyń sot tóreligi júıesindegi táýelsiz jáne bedeldi organ retindegi rólin kórsetedi.
«Qazaqstanda Konstıtýtsııalyq sottyń qaıta jańǵyrýy zańdylyqty nyǵaıtýdyń jáne azamattardyń konstıtýtsııalyq quqyqtarynyń saqtalýyna kepildik berýdiń mańyzdy kezeńine aınalady. Sot qyzmetiniń alǵashqy aılaryndaǵy jumysy jáne ótinishterdiń joǵary deńgeıi onyń únemi ózgerip otyratyn saıası jáne áleýmettik jaǵdaıda azamattardyń quqyǵy men bostandyǵyn qorǵaý júıesiniń quramdas bóligine aınalyp kele jatqanyn kórsetedi», - dedi QSZI sarapshysy.
