Prezıdent sýarmaly alqapty 2030 jylǵa deıin 1,3 mln gektarǵa jetkizýdi tapsyrdy
ASTANA. KAZINFORM — Jer qatelikti kótermeıdi, uqypty qarasa, kól-kósir paıdaǵa keneltedi. Bul týraly Aýyl sharýashylyǵy eńbekkerleriniń ІІІ forýmynda Memleket basshysy Qasym-Jomart Toqaev aıtty.
— Taǵy bir mindet — sýarmaly eginshiliktiń tıimdiligin arttyrý. Bul asa mańyzdy másele áli kúnge sheshimin tappaı keledi. Osy taqyryp tóńireginde qyzý pikirtalas júrip jatyr. Qazirgi tańda 700 myń gektar sýarmaly alqapta sý únemdeý tehnologııasy qoldanylady. Bul jalpy aýdannyń jartysyna da jetpeıdi. 2030 jylǵa deıin keminde 1 mıllıon 300 myń gektar jerdi qamtý mindeti tur. Máseleniń ózektiligin eskere otyryp, Úkimetke atalǵan sharýany turaqty kún tártibine engizýdi, ıaǵnı, kúndelikti jumys retinde qaraýdy tapsyramyn, — dedi Qasym-Jomart Toqaev.
Prezıdent búginde 4,6 myń shaqyrym sýarý arnasyna rekonstrýktsııalaý men jóndeý jumystary bastalǵanyn atap ótti.
— Myń shaqyrymǵa jýyǵy jyl sońyna deıin paıdalanýǵa beriledi. Nátıjesinde 200 myń gektar sýarmaly jerdiń jaǵdaıy jaqsarady. Úkimet ákimdiktermen birlesip, sýarmaly jerlerdi keńeıtý josparyn sý jetkizý múmkindikterimen, arnalardyń jaǵdaıymen jáne energııa jelileriniń qýatymen ushtastyrǵany abzal. Egin sharýashylyǵynyń áleýetin tolyq paıdalaný úshin ozyq ǵylymı tásilder men zamanaýı tehnologııalardy engizýge kúsh salýymyz kerek. Ózderińizge málim, jer qatelikti kótermeıdi. Biraq aıalap, uqypty qarasa, kól-kósir paıdaǵa keneltedi. Muny sizder jaqsy bilesizder, — dedi Memleket basshysy.