Prezıdent Strategııalyq josparlaý jáne reformalar agenttiginiń tóraǵasy Jandos Shaımardanovty qabyldady
ASTANA. KAZINFORM – Memleket basshysy Strategııalyq josparlaý jáne reformalar agenttiginiń tóraǵasy Jandos Shaımardanovty qabyldady. Bul týraly Aqordanyń baspasóz qyzmeti málim etti.
Jandos Shaımardanov:
álemdik jáne ulttyq ekonomıkadaǵy qazirgi trendter týraly aıtty;
qurylymdyq reformalardy odan ári júzege asyrý jóninde usynystar berdi;
memlekettik statıstıka men derekterdi basqarý negizderin ınstıtýtsıonaldyq turǵydan kúsheıtý týraly baıandady:
– Ulttyq statıstıka bıýrosyna ákimshilik derekkózderge qatysty memlekettik baqylaý ókilettigi berildi;
– jyl sońyna deıin 9 memlekettik organnyń derekter bazasy sapasyna baǵalaý júrgiziledi. Bul ákimshilik derekkózderi úshin sapa standarttary men halyqaralyq ádistemeni qoldanýǵa kómegin tıgizedi;
Agenttiktiń ákimshilik jáne balamaly aqparat kózderin belsendi paıdalanýdy eskere otyryp, statıstıkalyq qyzmetti qysqa merzimdi josparlaýdan úsh jylǵa deıingi orta merzimdi josparlaýǵa kóshýi jóninde aıtty;
atalǵan reformalar statıstıkalyq eseptilikti 2 esege deıin azaıtýǵa múmkindik beretinin jáne derekterdiń sapasy men resmı statıstıkaǵa degen senimdi arttyratynyn jetkizdi.
Kezdesý sońynda Prezıdent áleýmettik-ekonomıkalyq reformalardy jan-jaqty pysyqtaýdyń mańyzdy ekenine toqtalyp, Agenttik tóraǵasyna osy baǵyttaǵy jumystardy jalǵastyrýdy tapsyrdy.
