Prezıdent: Strategııalyq josparlarǵa ult birligi jáne qoǵamnyń áleýmettik irgetasy jetkizedi
ASTANA. KAZINFORM — Tártip, jaýapkershilik pen tabandy eńbektiń arqasynda taıaý ýaqytta aýyldarymyz ben qalalarymyzdyń kelbeti túbegeıli ózgeredi. Bul jóninde Qazaqstan halqyna Joldaýyn jarııalaý kezinde Prezıdent Qasym-Jomart Toqaev málimdedi.
Onyń sózinshe, elimiz jańa tarıhı kezeńge qadam basa otyryp, búkil azamattyq ınfraqurylymdy salý men jańǵyrtýǵa kirisip jatyr. Aldaǵy birneshe jylda qurylys qarqyny respýblıkanyń barlyq óńirin qamtıdy.
— Biz avtomobıl joldaryn, ónerkásiptik jáne energetıkalyq nysandardy, temirjoldardy, kópirlerdi, ınjenerlik jelilerdi, gıdrotehnıkalyq qurylystardy, mektepterdi, aýrýhanalardy, sport keshenderin jáne, árıne, mádenıet nysandaryn salamyz. Zamanaýı ınfraqurylym salý ondaǵan jańa óndiris ornyn ashýmen jáne, eń bastysy, halyq ıgiligine baǵyttalǵan tsıfrlyq ekonomıkany damytýmen tyǵyz baılanysty. Osylaısha, tártip, jaýapkershilik pen tabandy eńbektiń arqasynda biz taıaý ýaqytta aýyldarymyz ben qalalarymyzdyń kelbetin túbegeıli ózgertemiz. Ortaq úıimiz — Qazaqstan Respýblıkasyn anaǵurlym qýatty ári tartymdy memleketke aınaldyramyz. «Zań men tártip» qaǵıdatyn basshylyqqa alyp, ar-ujdanymyz aıasynda eńbek etsek, aldymyzǵa qoıǵan barlyq maqsatqa mindetti túrde jetip, urpaqtarymyzǵa laıyqty mura qaldyramyz, — dedi Prezıdent.
Memleket basshysy taǵy bir márte ult birligin, qoǵamnyń áleýmettik irgetasty nyǵaıtý kerek ekendigin aıtty.
— Buryn-sońdy bolmaǵan jahandyq syn-qaterler jaǵdaıynda biz ult birligin, qoǵamnyń áleýmettik irgetasyn jan-jaqty nyǵaıtýymyz kerek. Strategııalyq oı-nıetterimiz ben josparlarymyzdyń túpkilikti tabysqa jetýiniń kepili — dál osy. Osy joldy ustansaq, Qazaqstan álemdik órkenıettiń aldyńǵy qatarynan laıyqty oryn alatynyna senimdimin, — dedi ol.
Aıta keteıik, buǵan deıin Prezıdent ınklıýzıvti bilim alýǵa tıis 237 myń bala bar ekenin málimdep, ınfraqurylymdy damytýdy tapsyrdy.
