Prezıdent State Power Investment Corporation kompanııasy Dırektorlar keńesi tóraǵasyn qabyldady

BEIJІŃ. KAZINFORM – Prezıdent QHR-ǵa jumys sapary aıasynda State Power Investment Corporation (SPIC) kompanııasy Dırektorlar keńesiniń tóraǵasy Lıý Mınshenmen kezdesý ótkizdi.

Áńgimelesý barysynda energetıka salasyndaǵy yntymaqtastyqty odan ári damytý, sonyń ishinde jańartylatyn energııa kózderine negizdelgen seriktestik perspektıvasy talqylandy.

Qasym-Jomart Toqaevqa China Power International Holding enshiles kompanııasynyń Qazaqstanda belsendi jumys istep jatqany jóninde málimet berildi. Sońǵy bes jylda Jańatasta jel energııasy jobasy júzege asyrylyp, Qaraǵandyda kún elektr stantsııasy salyndy.

Qytaıdyń eń iri energetıkalyq kompanııalarynyń biri sanalatyn SPIC korporatsııasynyń basshysy Jambyl jáne Pavlodar oblystarynda jalpy qýaty 1 GVt bolatyn jel elektr stantsııalaryn salýǵa qatysty jańa ınvestıtsııalyq jobalardyń júzege asyrylý barysy jóninde baıandady. Bul jobalarǵa bir mıllıard dollardan astam ınvestıtsııa salynǵan.

Sondaı-aq Lıý Mınshenniń aıtýynsha, kompanııa Qazaqstanda aýqymdy gıdroenergetıkalyq jobalar men bý-gaz týrbınalaryn salý perspektıvasyn zertteýge nıetti.

Prezıdent elimizdiń jańartylatyn energııa salasyna úzdik halyqaralyq tehnologııalar men tájirıbelerdi engizýge múddeli ekenin atap ótti.

Kezdesý sońynda Qasym-Jomart Toqaev Lıý Mınshendi bıyl maýsym aıynda ótetin Astana halyqaralyq forýmyna qatysýǵa shaqyrdy.