Prezıdent Stadler Kazakhstan zaýytymen tanysty
ASTANA. KAZINFORM – Memleket basshysyna Stadler Kazakhstan zaýyty shyǵarǵan alǵashqy jolaýshylar vagony tanystyryldy. Bul týraly Aqordanyń baspasóz qyzmeti habarlady.
Jańa vagondardyń basty artyqshylyǵy – jolaýshylardyń jaılylyǵy men qaýipsizdigin arttyrýdy kózdeıtin zamanaýı ınjenerlik sheshimder. Qatań klımattyq jaǵdaıǵa beıimdelip jasalǵan vagondardy qoldaný merzimi – 40 jyl.
Kásiporyn kýpe, platskart jáne qozǵalysy qıyn jolaýshylar úshin arnaýly vagondar shyǵarady. Bıyl 51 vagondy, al 2030 jylǵa deıin 557 jańa vagondy paıdalanýǵa berý josparlanǵan. Bul ulttyq tasymaldaýshynyń vagon parkin tolyǵymen jańartýyna múmkindik beredi. Óndiristi lokalızatsııalaýǵa qazaqstandyq kásiporyndar tartylǵan.
Prezıdent temir jol salasynyń jumysshylarymen áńgimelesti.
Qasym-Jomart Toqaevqa temir jol qatynasy júıesin jańǵyrtý barysy jóninde esep berildi. Búkil el boıynsha 125 vokzalǵa jóndeý jumystary júrgizilýde. Halyqaralyq seriktestermen birlesip, jolaýshy tasymaldaý júıesindegi qyzmet kórsetý sapasyn arttyrýǵa jáne óńirlerdegi kólik baılanysyn jaqsartýǵa baǵyttalǵan sheshimder engizilip jatyr.
Atap aıtqanda, otandyq ІT kompanııalar jolaýshylarǵa arnalǵan biryńǵaı tsıfrly platforma ázirledi. Bul bılet satyp alýdan bastap týrıstik qyzmet kórsetýge deıingi kóptegen fýnktsııany biriktiredi. Sondaı-aq poıyzdar spýtnıktik ınternetke qosylady. Qaýipsizdikti kúsheıtý maqsatynda vıdeotirkeýler, mobıldi termınaldar, jasandy ıntellekt tehnologııasy negizinde málimetterdi taldaýǵa qabiletti 4 myń kamera paıdalanylady.
Eske sala keteıik, buǵan deıin Memleket basshysynyń «Dáýlet» tennıs ortalyǵyna barǵanyn habarlaǵan edik.