Prezıdent SOVICO Group kompanııasynyń basqarma tóraǵasy Ngýen Than Hýngpen kezdesti
SINGAPÝR. KAZINFORM – Kezdesýde SOVICO Group kompanııasynyń Qazaqstan ekonomıkasyndaǵy túrli sektorǵa áleýetti ınvestor retinde qatysý perspektıvasy talqylandy.
Memleket basshysynyń pikirinshe, SOVICO Group kompanııasynyń Qazaq Air avıakompanııasyn satyp alýǵa nıet bildirýi vetnamdyq konglomerattyń bizdiń óńirde azamattyq avıatsııany damytýǵa qatysty asa mańyzdy jospary bar ekenin kórsetedi.
Ngýen Than Hýng kompanııanyń Qazaqstandaǵy birneshe áýejaıdy basqarýǵa alý, sondaı-aq logıstıkalyq qoımalarǵa ınvestıtsııa quıý isine qyzyǵýshylyq tanytatynyn jetkizdi. SOVICO kompanııalar tobynyń quramyna kiretin Vietjet Air avıakompanııasy elimiz arqyly júk jáne jolaýshylar tasymaldaıtyn áýe reısteriniń sanyn birtindep kóbeıtip keledi.
Qasym-Jomart Toqaevqa Vetnam men Sıngapýr ınvestorlary qatysatyn úshjaqty seriktestik qurý usynyldy. Atalǵan bastama avıatsııa, taý-ken ónerkásibi, jańartylatyn energııa kózderi, «aqyldy qalalar» jáne aktıvterdi basqarý sekildi túrli salalardaǵy birlesken jobalardy ilgeriletýge baǵyttalǵan.
Memleket basshysy kompanııanyń ártaraptandyrylǵan bıznes júrgizýde tájirıbesi mol ekenin eskerip, ózara tıimdi yntymaqtastyqtyń odan ári nyǵaıa túsetinine senim bildirdi.
Kezdesý barysynda «Samuryq-Qazyna» aktsıonerlik qoǵamy men SOVICO kompanııalar tobyna kiretin Aviation Holdings Company arasynda Qazaq Air avıakompanııasyn satyp alý sharttaryna qatysty mindet júkteıtin usynysqa qol qoıylǵany jóninde habarlandy. Aldyn ala jasalǵan ýaǵdalastyqtarǵa sáıkes ınvestor 5 jyl ishinde Boeing 737-Max8 jáne Airbus A320/321 modeldi keminde 20 ushaq ákelýdi josparlap otyr. Satyp alý-satý shartyna qol qoıý jáne mámileni aıaqtaý jumystary jaqyn arada iske asyrylmaq.
Qazaqstan-Sıngapýr bıznes forýmy aıasynda Qazaqstan Respýblıkasy Kólik mınıstrligi men SOVICO Group arasyndaǵy Strategııalyq seriktestik jónindegi ózara túsinistik týraly memorandýmǵa qol qoıyldy.
