Prezıdent: Sotta qaralǵan isterdiń jartysynan kóbi azamattar men bıznestiń paıdasyna sheshilip otyr

ASTANA. KAZINFORM — Qasym-Jomart Toqaev bul týraly «Altyn sapa» jáne «Paryz» syılyǵynyń laýreattaryn, «Qazaqstannyń úzdik taýary» respýblıkalyq kórme-konkýrsynyń jeńimpazdaryn marapattaý rásiminde aıtty.

– Bıznestiń múddesi men quqyǵyn qorǵaý máselesi – bizdiń aldymyzda turǵan asa mańyzdy mindet. Sońǵy jyldary quqyq jáne sot júıesin jańǵyrtý úshin aýqymdy jumys júrgizilip jatyr. Ákimshilik ádilet ınstıtýty paıda boldy. Bul bastamalar qazirdiń ózinde jaqsy nátıje bere bastady. Sotta qaralǵan isterdiń jartysynan kóbi azamattar men bıznestiń paıdasyna sheshilýde. Bıznesti negizsiz tekserýler men zańsyz qylmystyq qýdalaýdyń aldyn alý boıynsha belsendi jumys atqarylyp jatyr. Ekonomıkalyq qylmystardy dekrımınalızatsııalaý júrgizildi. Munyń bári «Zań men tártip» qaǵıdatynyń ornyǵa túsýine yqpal etedi. Bas Prokýratýranyń Zańsyz aktıvterdi qaıtarý jónindegi komıteti jyl sońyna deıin Investorlardyń quqyǵyn qorǵaý jónindegi komıtet bolyp ózgeredi. Іri ınvestorlarǵa arnalǵan «Jasyl dáliz» júıesi iske qosyldy. Endi olarǵa ruqsatnama qujattary tez beriletin boldy, – dedi Memleket basshysy.

Aıta keteıik, Qasym-Jomart Toqaev búgin «Meıirim» ordenin taǵaıyndady.

Osy jıynda Prezıdent elimizde tabysty bıznespen aınalysýǵa qolaıly jaǵdaı jasalǵanyn aıtty.