Prezıdent sońǵy jyldary iske asqan saıası reformalardy atady

QYZYLORDA. KAZINFORM – Ulttyq quryltaıdyń V otyrysynda Memleket basshysy Qasym-Jomart Toqaev sońǵy jyldary elimizde júzege asyrylǵan saıası reformalardy atady.

- Sizderdiń árqaısyńyz aýqymdy reformalardy júzege asyrýǵa belsene qatysyp, oryn jatqan ózgeristerdiń logıkasyn jaqsy túsinesizder. Saıası jańǵyrtýdyń basty maqsaty – Qazaqstannyń áleýetin nyǵaıtý, memleketimizdiń qazirgi zamanǵy syn-qaterlerge tótep berý qabiletin (rezıstentsııasyn) kúsheıtý. Munda formaldy ózgerister emes, memlekettik ınstıtýttardyń mán-maǵynasyn oń baǵytta transformatsııalaý, olardyń ózara is-qımylyn jaqsartý mańyzdy, - dedi Qasym-Jomart Toqaev.

Prezıdenttiń aıtýynsha, 2022 jylǵy konstıtýtsııalyq reformalardyń arqasynda teńgerimdi saıası júıe qalyptastyrýǵa jáne memlekettik basqarýdyń tıimdiligin arttyrýǵa baǵyttalǵan birqatar shara qabyldandy. Zań ústemdigin nyǵaıtý jáne quqyqtyq mádenıetti ornyqtyrý maqsatynda Konstıtýtsııalyq sot quryldy. Jańa Ákimshilik rásimdik-protsestik kodeks sot sheshimderiniń tepe-teńdigin azamattar men kásipkerlerdiń paıdasyna ózgertip, olarǵa ózderiniń zańdy múddelerin tabysty qorǵaýǵa múmkindik berdi.

- Azamattardyń quqyqtaryn qorǵaý júıesin kúsheıtýdegi mańyzdy qadam kassatsııalyq sottardyń qurylýy jáne Adam quqyqtary jónindegi ýákildiń konstıtýtsııalyq mártebe alýy boldy. Saılaý júıesi men bıliktiń ókiletti organdaryn qalyptastyrý tártibi jańǵyrtylyp, olardyń saıası yqpaly men ókilettikteri edáýir kúsheıtildi. Jańa saılaý modeli ártúrli ıdeologııalyq kózqarastaǵy jáne saıası partııalardaǵy ókilderdiń Parlament pen máslıhattarǵa kelýine jol ashty. Aýyl ákimderin saılaý engizilgennen keıin atqarýshy bılik júıesinde de jańarý tolqyny júrip ótti. Mańyzdy konstıtýtsııalyq jańalyqtardyń biri – Memleket basshysynyń týystaryna basqarý júıesinde joǵary, negizgi laýazymdardy atqarýǵa tyıym salynýy boldy, - dedi Memlkekt basshysy.

Aıta keteıik, Prezıdent bıyl Qazaqstannyń keleshegine tikeleı yqpal etetin asa mańyzdy jyl bolatynyn habarlady.