Prezıdent: Sońǵy jeti jylda elimizde 1 mıllıonnan astam oqýshyǵa arnalǵan 1342 mektep salyndy
ASTANA. KAZINFORM – Qasym-Jomart Toqaevtyń paıymdaýynsha, jas urpaq damyǵan memlekette, qaýipsiz ortada, órkenıetti qoǵamda ómir súrýi kerek, dep habarlaıdy Aqorda.
Qazir Qazaqstanda 4 mıllıonnan astam oqýshy bar, ıaǵnı, elimizdiń árbir besinshi azamaty mektepte bilim alyp jatyr.
– Osy maqsatpen biz barshaǵa birdeı múmkindik beretin, Ádiletti, Kúshti, Taza jáne Ozyq Qazaqstandy qurý isin qolǵa aldyq, aýqymdy reformalardy júzege asyrdyq. Halqymyzdyń temirqazyǵy, elimizdi tarıhı órleý dáýirine bastaǵan negizgi qujat – Konstıtýtsııany qabyldadyq. Konstıtýtsııada tuńǵysh ret oqý-aǵartý júıesin damytýǵa yqpal etetin naqty normalar kórinis tapty. Atap aıtqanda, adam kapıtalyn, bilim-ǵylymdy jáne ınnovatsııany damytý memlekettiń mindeti, strategııalyq baǵyty retinde bekitildi. Túptep kelgende, bul – zaman talaby. Sonymen qatar biz bılik júıesin túbegeıli jańǵyrttyq. Elimizde bir palataly Quryltaıdyń alǵashqy saılaýy ótti. Úkimettiń jańa quramy jasaqtaldy. Vıtse-Prezıdent taǵaıyndaldy. Jańa memlekettik organ – Qaýipsizdik Keńesiniń Apparaty quryldy. Jaqynda Qazaqstan Halyq Keńesi óz jumysyn bastady. Osylaısha, biz bir ult bolyp elimizdiń damý baǵdaryn aıqyndaǵan mańyzdy ári irgeli jumysty tabysty atqardyq, – dedi Memleket basshysy.
Prezıdenttiń pikirinshe, órkenıetti ári ozyq eldiń qýaty onyń tabıǵı baılyǵymen emes, eń aldymen, adam kapıtalynyń sapasymen ólshenedi. Memlekettiń álemdegi orny da, ekonomıkalyq áleýeti de qoǵamdaǵy bilim men ǵylymnyń deńgeıine táýeldi.
– Ózderińiz bilesizder, biz bul baǵytta naqty sharalar qabyldap, belsendi jumys istep jatyrmyz. Máselen, sońǵy jeti jylda elimizde 1 mıllıonnan astam oqýshyǵa arnalǵan 1342 mektep salyndy. Bıyl taǵy 101 mektep salynyp jatyr. «Keleshek mektepteri» ulttyq jobasy aıasynda bilim berý mekemeleriniń jańa standarty qalyptasty. Sonyń arqasynda zamanaýı ınfraqurylymy bar, balalardyń sapaly bilim alyp, damýyna barlyq jaǵdaı jasalǵan oqý ordalary boı kóterýde. Búginde 460 myń oqýshyǵa arnalǵan osyndaı 217 mektep salyndy. Sol mektepterdiń 84-i, ıaǵnı 40 paıyzǵa jýyǵy aýyldyq jerde ornalasqan. Men óz sózderimde árdaıym aıtyp júrmin: aýyl mektebi de, qala mektebi de balalarǵa birdeı sapaly bilim beretin zamanaýı oqý mekemesi bolýy kerek. Qazirgi tańda memleket Jasandy ıntellekt júıesine negizdelgen arnaıy sabaqtardy orta mektepterge jappaı engizý baǵdarlamasyn iske asyrýda. Bul – óte mańyzdy jumys. Úkimet osy máselege basa mán berýge tıis. Jalpy, aımaqtarda mektep tapshylyǵy máselesi bolmaýy kerek. Óıtkeni taǵy da qaıtalap aıtamyn, bul – memlekettiń bolashaǵyna áser etetin óte mańyzdy faktor. Úkimet osy máseleni de árdaıym nazarda ustaýy qajet, – dedi Memleket basshysy.
Aıta keteıik, Prezıdent ustazdyń ár adamnyń ómirinen erekshe oryn alatyn tulǵa ekenin aıtty.
