Prezıdent Soltústik Qazaqstan oblysynyń 90 jyldyǵymen quttyqtady
ASTANA. KAZINFORM — Memleket basshysy Soltústik Qazaqstan oblysynyń qurylǵanyna 90 jyl tolýyna arnalǵan saltanatty jıynǵa qatysýshylardy quttyqtady. Bul týraly Aqordanyń baspasóz qyzmeti habarlady.
Qadirli qaýym!
Sizderdi Soltústik Qazaqstan oblysynyń qurylǵanyna 90 jyl tolýymen shyn júrekten quttyqtaımyn!
Osy ýaqyt ishinde Qyzyljar óńiri damýdyń dańǵyl jolynan ótip, shejireli ólkege aınaldy.
Qazirgi tańda Soltústik Qazaqstan elimizdiń astyqty aımaǵynyń biri sanalady. Dıhandarymyz eginshilik kásiptiń qyr-syryn meńgerip, memleketimizdiń azyq-túlik qaýipsizdigin qamtamasyz etýge zor eńbek sińirip júr.
Aımaqta aýyl sharýashylyǵymen qatar óńdeý ónerkásibi, mashına jasaý salalary qarqyndy damyp keledi. Investıtsııalyq jobalar qolǵa alynyp, óndiris oryndary iske qosyldy. Munyń bári halyqtyń turmysyn jaqsartyp, óńirdiń odan ári órkendeýine yqpal etetini anyq.
Bul óńirde kúrdeli kezeńde el birligin saqtap, danalyq pen kóregendik sımvolyna aınalǵan áıgili Abylaı hannyń izi qalǵan. Soltústik Qazaqstannan halqymyzǵa, sondaı-aq búkil álemge tanymal memleket jáne qoǵam qaıratkerleri, mádenıet pen ádebıet salasynyń asa kórnekti ókilderi, eńbek ardagerleri, kóptegen qurmetti tulǵalar, áıgili sportshylar men quqyq qorǵaý salasynyń bilikti mamandary shyqty.
Biz birtutas ári jasampaz el retinde aýqymdy ózgeristerdi tabysty júzege asyryp jatyrmyz. Taıaýda ǵana ult damýynyń temirqazyǵy sanalatyn Jańa Konstıtýtsııamyz zańdy kúshine endi. Bas qujatta halqymyzdyń san ǵasyrlyq arman-muraty men keleshekke baǵdar bolatyn myzǵymas qundylyqtary naqty kórinis tapty.
Ata Zańdy qabyldaýǵa aımaq jurtshylyǵy da belsene qatysyp, aýyzbirshilik pen jaýapkershiliktiń ozyq úlgisin kórsetti. Oblysta túrli etnos ókilderi ózara qurmet pen dostyq dástúrin saqtap, tatý-tátti ómir súrip jatyr. Berekeli óńir barlyq jetistikke azamattardyń jasampazdyq qýatynyń arqasynda qol jetkizip keledi. Sizder aldaǵy ýaqytta da el ıgiligin eseleýge atsalysa beresizder dep senemin.
Barshańyzǵa amandyq, tolaǵaı tabys tileımin!
Soltústik Qazaqstan oblysy ósip-órkendeı bersin!
